ग्लोबल न्यूज ब्रेक मिडिया अनलाइनहरुको भीडमा थपिन पुगेको एउटा अर्को संस्थामात्र होइन। भीडमा हराउन या भीडको पछि लाग्न होइन, सञ्चार माध्यमको आदर्श, मूल्य र मान्यता बोक्दै नागरिक तथा वैयक्तिक स्वतन्त्रता, सार्वभौमसत्ता र मुलुकको स्वतन्त्रताको पक्षमा अडिने प्रणका साथ अस्तित्वमा आएको हो- ग्लोबल न्यूज ब्रेक।
हामी कुनै राजनीतिक दल या दलीय संकीर्णतामा आवद्ध छैनौँ। प्रजातन्त्र र त्यसलाई आत्मसात गर्ने संवैधानिक व्यवस्था तथा जवाफदेहीताबाट निर्देशित सत्ता, प्रतिपक्ष र नागरिकहरु अनि स्वतन्त्र न्यायपालिका जिम्मेवार र स्वतन्त्र सञ्चारका लागि आवश्यक सर्त हुन्। प्रजातन्त्र र स्वतन्त्र सञ्चार एकको अभावमा अर्को अपूर्ण रहन्छन्।
समाचारको वस्तुनिष्ठ प्रस्तुति र सबै खाले विचारको साझा मञ्च हौँ हामी जहाँ निषेधको नीति र वैचारिक असहिष्णुताले कुनै स्थान पाउने छैन।
प्रबासमा नेपाली डिजिटल पत्रकारिता एउटा ‘रहरकारिता’ मा मात्र सिमित भएको तपाई पाठकहरु नै ज्ञाता हुनु हुन्छ। केहि अपबाद बाहेक अमेरिकामा रहरका लागि स्थापना गरिएका प्रायस डिजिटल मिडियाहरुको भीडमै जन्मिएको नेपाली सस्करणको यस ग्लोबल न्यूज ब्रेकका लागि यो समय निश्चय पनि चुनौतीपूर्ण हुनेछ।
डिजिटल मिडियाको व्यापक विकास र विस्तार भइरहेको यो समयमा पाठकका लागि विभिन्न विकल्प उपलब्ध छन्। त्यसैले पत्रकारितालाई अझ विशिष्टीकरणतर्फ अगाडि बढाउन हामी प्रतिबद्ध छौं– ताकि रहरकारिता तथा पर्चाकारिता गर्दै आएका मिडियाको भीडबाट हाम्रा पाठकले अलग , उत्कृष्ट, निष्पक्ष र रोचक सामग्री प्राप्त गर्न सकून्।
सिद्धान्ततः पत्रकारले जहिले पनि रचनात्मक प्रतिपक्षको भूमिका निर्वाह गर्दछ। तर, अधिकांश सरकारहरु मिडियालाई आफ्नो प्रचारप्रसार टोलीका रुपमा हेर्न चाहन्छन्। केही मिडिया यसको हिस्सा बन्छन् पनि। यता प्रबासमा नेपाल कै सिको सिकेर ब्यक्ति वा सस्थाको मुखपत्रका रुपमा पर्चाकारिता गर्ने गरेका कारण सबै नेपाली मिडियाहरु उस्तै हुन् भन्ने भनाइ समूदायबाट सुन्ने गरिएको छ। तर, हामीलाई थाहा छ, हाम्रा पाठक सत्य जान्न चाहन्छन्, न्यूज रुममा उत्पादन गरिएका कृत्रिम कथा होइन, न त कसैको प्रचार नै। पाठकको यही रुचि साँचो र असल पत्रकारिताका लागि हौसला बन्छ।
अर्कोतिर, डिजिटल मिडियाको बाढी, समाचार ब्रेक गर्ने होड, भिजिटर बढाउने र भाइरल हुने मोहले उत्तरादायी पत्रकारितामा नकारात्मक प्रभाव पारेको छ। तर, हामी सामाजिक रुपान्तरणका लागि, जनहितका लागि र सत्य स्थापित गर्नका लागि यो होडबाजी भन्दा पर थुप्रै नभनिएका कथा भन्ने प्रयत्न गर्नेछौं।
प्रबासमा सामूदायका भन्न बाँकी कथाहरु धेरै छन्। कसैले नसुनिदिएका तर सुन्नैपर्ने आवाज प्रशस्त छन्। हाम्रो चेतनाका अंश बनिसकेका ती कथा र आवाज समेट्दै हामी अघि बढ्नेछौं।
अहिले विश्व कोभिड– १९ को महामारीबाट संकटग्रस्त छ। यसले पत्रकारिताको आयाममा पनि परिवर्तन ल्याउँदै छ। रिपोर्टिङका तरिकामा फेरबदल आएको छ। यो महामारी र बन्दाबन्दीको चुनौतीका बीच बदलिएको परिस्थितिमा हामी हाम्रा पाठकलाई निरन्तर सुसूचित गराइरहनेछौं।
हामी प्रतिज्ञा गर्दछौ:
- हामी स्वतन्त्र रहदै कुनै ब्यक्ति वा संस्था बिशेषको प्रायोजनमा वा आर्थिक सहयोग उठाई तिनको भजन गाउने छैनौ।
- हामी नैतिक पत्रकारिताको जगमा रही समूदायको हितमा हुने सामाग्रीहरु – सूचनामुलक, ज्ञानबर्द्दक र समूदायका भन्न बाँकी कथाहरु र ब्यथाहरु मात्र सम्प्रेषण गर्नेछौ।
- भाइरल हुने , भ्यूज बढाउने र समूदायमा फाटो ल्याउने मनसायका सामाग्रीहरु सम्प्रेषण गरिने छैनन्।
- यो मिडिया एक नन प्रोफिक्ट सरहको हुनेछ र यसको ब्याबसायिक बिज्ञापनबाट उठेको रकममा खर्च कटाई हुने आम्दानीको सत प्रतिशत रकम सामूदायिक हितमा खर्च गरिनेछ।
- अग्रेजी संस्करणमा झैँ यस नेपाली संस्करणमा समेत इन्टर्न तथा भोलेन्टियरहरुले काम गर्ने छन। यस प्रयासबाट सरल र नैतिक पत्रकारिताको जग बसाउन एउटा अवसर प्राप्त हुने हाम्रो बिश्वास छ।
- अत: यो मिडिया समूदायमा समर्पित भएकाले यस अभियानकालागि सामूदायिक बिषयका लेख, रचना, समूदायका भन्न बाँकी दुख र सुखका कथाहरु पठाउन हार्दिक अनुरोध गर्दछौ।
