भर्जिनिया, अमेरिका
३१ जुलाई २०२४ देखि मनासस, भर्जिनियाबाट ममता काफ्ले भट्ट बेपत्ता भएकी छन्, र प्रहरी अनुसन्धानमा उनका पति नरेश भट्टलाई घटनासँग सम्बन्धित भएको गम्भीर आरोपमा पक्राउ गरिएको छ। प्रहरीद्वारा अदालतमा प्रस्तुत गरिएको आरोप पत्रमा ममताको हत्या ३० जुलाईमा भएको विश्वास गरिएको छ। अनुसन्धानकर्ताहरूले ममताको मृत्युको प्रमाणहरू उनको घरमा फेला पारेका छन्।
प्रहरीले नरेश भट्टमाथि आफ्नो पत्नीको हत्या गरी मृत शरीर लुकाएको/बेपत्ता पारेको आरोप लगाएको छ, र अदालतमा पेश गरेको आरोप पत्रमा फरेन्सिक रिपोर्ट लगायत बेडरूम र बाथरूममा भेटिएको रगत, ममताको शवलाई घिसारेको र घरबाट बाहिर निकालिएको प्रमाण पनि समावेश गरिएको छ।
गोफन्डमी अभियान र समुदायमा तनाव
ममता काफ्ले भट्ट बेपत्ता भए पछि भर्जिनियाका समुदायका सदस्यहरूले दुईवटा गोफन्डमी अभियान सुरु गरेका छन्। यी दुई अभियानले ममतासँग सम्बन्धित विभिन्न पक्षहरूलाई सहयोग गर्न उल्लेखनीय रकम संकलन गरेको भए पनि, यसले समुदायभित्र विवाद र तनाव पनि सिर्जना गरेको छ।
नादिया नाभारोको गोफन्डमी अभियान: खोजी प्रयास र जनचेतना अभिवृद्धिका लागि सहयोग
ममताकी निकट साथी भनिएकी नादिया नाभारोले पहिलो गोफन्डमी अभियान सुरु गरेकी थिइन्। प्रारम्भमा, संकलित रकम खोजी प्रयासहरू र स्वयंसेवकहरूका लागि आवश्यक सामग्री खरिदमा प्रयोग हुने भनिएको थियो। तर, परिस्थितिको विकाससँगै, नादियाले अभियानका लक्ष्यहरू दुई पटक अपडेट/अद्यावधिक गरिन्।
सबैभन्दा महत्वपूर्ण परिवर्तन ४ सेप्टेम्बर २०२४ मा गरियो, जब नादियाले खोजी अभियानलाई नयाँ दिशामा लैजाने घोषणा गरिन्। उनले ममताको खोजीमा लागेको लामो समय र यसले पाएको व्यापक ध्यानाकर्षणका कारण आफूले धेरै अप्रत्याशित खर्चको सामना गर्नु परेको बताएकी छन। यस कार्यकालागी आफूले पूर्ण रूपमा समय दिनु पर्ने, आफ्नो व्यक्तिगत आवश्यकताहरू पुरा गर्नु पर्ने र जारी खोजी अभियान प्रयासहरूको लागि आर्थिक सहयोग आवश्यक रहेको स्पष्ट गरेकी छन।
नादियाले आफ्नो नयां योजनाहरूमा निम्नलिखित खर्चहरू गरिने उल्लेख गरेकी छन्:
घरेलु हिंसाबारे जनचेतना अभिवृद्धि: ममताको घटनासँग सम्बन्धित घरेलु हिंसाबारे सचेतना फैलाउन टी-शर्ट, ब्रेसलेट र अन्य सामग्रीहरू उत्पादन गर्ने।
व्यक्तिगत र कानुनी खर्चहरू: गाडी मर्मत, खाना, औषधि, कानुनी पत्राचार, र आफ्नो परिवारको सुरक्षाका लागि आवश्यक पर्ने खर्चहरू।
नादियाले स्पष्ट पारिन् कि यदि दाताहरूले उनको व्यक्तिगत खर्चमा सहयोग गर्न चाहँदैनन् भने, उनीहरूले यस अभियानमा डोनेशन नगर्न समेत आग्रह गरेकी छन। यसको बदला, ममताको बच्चाका लागि नेपाली समुदायले अलग्गै स्थापना गरेको गोफण्डमी कोषमा सहयोग गर्न आग्रह गरेकी छन। साथै, उनले फन्डको व्यवस्थापनमा असन्तुष्ट व्यक्तिहरूलाई फिर्ता रकम माग्न सक्ने विकल्प पनि दिएकी छन।
नादियाको यो नयां योजनाले समुदायमा ठुलो बहस उत्पन्न गरेको छ, विशेषगरी व्यक्तिगत खर्चको लागि रकमको प्रयोगको विषयमा। यसले अभियानको पारदर्शिता र उद्देश्यबारे प्रश्नहरू उठाएको छ।
सरिता न्यौपानेको गोफन्डमी अभियान: ममताको छोरीलाई सहयोग
यसैबीच, सरिता न्यौपानेका तर्फबाट ममताकी एक वर्षीया छोरीको भविष्यलाई सुरक्षित गर्न अर्को गोफन्डमी अभियान चालु छ। यो अभियानले २ लाख ५० हजार डलरको लक्ष राखेकोमा यतिबेला सम्म $२३८,००० भन्दा बढी रकम संकलन गरेको छ, जसलाई बच्चाको हेरचाह र सहयोगका लागि एउटा विशेष ट्रस्ट फन्डमा राखिनेछ। सरिताको अभियानले ममताकी छोरीको दीर्घकालीन हेरचाहलाई प्राथमिकता दिने भएकाले समुदायबाट व्यापक समर्थन पाएको छ।
समुदायमा विवाद र प्रतिस्पर्धात्मक कोष संकलन
नादियाको अभियान, जसले $५०,००० को लक्ष्य राखेर $२०,००० संकलन गरेको छ, र सरिताको अभियान, जसले $२३८,००० भन्दा बढी संकलन गरेको छ, दुई बीचको ठुलो आर्थिक असमानताले प्रतिस्पर्धात्मक धारणा पैदा गरेको छ। सामाजिक सञ्जाल र समुदायभित्र विभिन्न प्रश्नहरू उठेका छन्, त्यसमा विशेषगरी नादियाले जारी गरेको फन्डको प्रयोगबारेमा पक्ष र विपक्ष जस्तै आरोप र आक्षेपहरू सार्वजनिक भएका छन।
नादियाको अभियानको समर्थन गर्नेहरूले खोजी प्रयासहरू र जनचेतना अभिवृद्धिको महत्त्वलाई जोड दिएका छन्, जबकि सरिताको अभियानलाई समर्थन गर्नेहरूले ममताकी छोरीको भविष्य सुरक्षित गर्न आवश्यक रहेकोमा जोड दिएका छन्। दुई अभियानबीचको प्रतिद्वन्द्विताले तनाव बढाएको छ, जसले गर्दा धेरैलाई आफ्नो समर्थन कहाँ केन्द्रित गर्ने भन्नेमा द्विविधा परेको छ।
अगाडि बढ्दै: विभाजनका बीच एकता
दुवै अभियानहरूले ध्यान आकर्षित गर्न र कोष सङ्कलन गर्न जारी राखे पनि, समुदायभित्र नादिया र सरिताबीच पारदर्शिता र सहयोगको रकमको सहि प्रयोगका लागि ठूलो माग छ। कतिपयले आयोजकहरूलाई एकसाथ काम गर्न सुझाव दिएका छन् ताकि खोजी र सहयोगका प्रयासहरूको दोहोरोपन रोक्न सकियोस् र ममताको मुद्दा र उनकी छोरीको भविष्यका सबै पक्षहरू पर्याप्त रूपमा सम्बोधन गर्न सकियोस।
नादिया र सरिताले आफ्नो अभियानले प्राप्त गरेको समर्थनको कदर गर्दै आएका छन्, तर उनीहरूको विभाजित प्रयासहरूले उत्पन्न गरेको चुनौतीलाई पनि स्वीकारेका छन्। दुवै पक्ष आ-आफ्ना लक्ष्यहरूमा प्रतिबद्ध छन्, नादिया जनचेतना अभिवृद्धि र न्यायको खोजीमा केन्द्रित छिन् भने सरिता ममताकी छोरीको हेरचाहमा।
सत्य, तथ्य र स्वतन्त्र सामूदायिक डिजिटल मिडिया
