नेपालले युएईमा जारी आइसिसी यू-१९ पुरुष विश्वकप क्रिकेटको एसिया छनोट प्रतियोगितामा लगातार चौथो पटक जितेको छ । नेपालले मंगलबार मलेसियालाई १० विकेटले हराउँदै लगातार चौथो जित हात पारेको हो । नेपालले पहिलो खेलमा सिंगापुरलाई ९६ रन, दोस्रो खेलमा कुवेतलाई दुई सय ४३ रन र तेस्रो खेलमा हङकङलाई नौ विकेटले हराएको थियो ।
मलेसियाले दिएको ७३ रनको विजयी लक्ष्य नेपालले ९ ओभरका पूरा गरेको थियो । जितसँगै नेपालले विश्वकपमा छनोट हुने सम्भावना बढाएको छ । नेपाल अब विश्वकप छनोटबाट एक खेलमात्र टाढा छ ।
नेपालका लागि ओपनर दीपक बोहोराले अविजित ३८ र अर्जुन कुमालले अविजित २१ रन बनाएका थिए ।
यसअघि पहिला ब्याटिङ गरेको मलेसियाले ३५.३ ओभरमा सबै विकेटको क्षतिमा ७२ रन बनाएको थियो । मलेसियाका लागि मोहम्मद अक्रम मालेकले सर्वाधिक २६ रन बनाएका थिए । मोहम्मद सायाहिर र मोहम्मद हरिसानले १२/१२ रन बनाए भने अन्य खेलाडीले भने दोहोरो अङ्कको रन बनाउन सकेनन् ।
बलिङमा नेपालका दीपेश कँडेलले चार विकेट, आकाश चन्दले तीन, मिलन बोहोराले दुई तथा सुवास भण्डारीले एक विकेट झारेका थिए ।नेपाल सन् २०१६ पछि पहिलो पटक विश्वकपमा छनोटको मुखमा रहेको हो । नेपालले अब अन्तिम खेल बुधबार आयोजक युएईसँग खेल्नेछ ।
छनोट खेलमा आयोजक युएईसहित नेपाल, हङकङ, कुवेत, मलेसिया र सिंगापुर सहभागी छन् । छनोट प्रतियोगिताको शीर्षस्थानमा रहने टोलीले सन् २०२४ मा श्रीलङ्कामा आयोजना हुने यू–१९ विश्वकपमा स्थान बनाउनेछ ।
उता युएईले कुवेतलाई ८ विकेटले हराउँदै लगातार चौथो जितका साथ शीर्षस्थान कायम राखेको छ । नेट रन रेटका कारण युएई शीर्ष स्थानमा छ । युएई ४ खेलमा ८ अंकका साथ ४.२६८ नेट रन रेट सहित शीर्ष स्थानमा छ।
नेपाल ४ खेलमा ८ अंकका साथ दोस्रो स्थानमा छ । नेपालको नेटरनरेट ३.८२९ छ । नेपाल र युएईबीचको खेल बिहीबार आजमानका रहेको इडेन गार्डेनमा हुनेछ । उक्त खेलको विजेता टोली प्रतियोगिता च्याम्पियन बन्नेछ । प्रतियोगिता च्याम्पियन टोलीले २०२४ मा श्रीलङ्कामा आयोजना हुने यू-१९ विश्वकप खेल्न पाउनेछ ।
सत्य, तथ्य र स्वतन्त्र सामूदायिक डिजिटल मिडिया
