नेदरल्याण्ड्सको सबैभन्दा लामो समय सेवा गर्ने सरकार प्रमुखको रूपमा रहेका प्रधानमन्त्री मार्क रुटेले आफ्नो राजनीतिक यात्राको अन्त्यको सङ्केत गर्दै राजनीतिबाट सन्यास लिने घोषणा गरेका छन्। आप्रवासन नीतिको विवादका कारण उनको गठबन्धन सरकार पतन भएपछि यो निर्णय आएको हो।
लिबरल कन्जरभेटिभ पिपुल्स पार्टी फर फ्रिडम एण्ड डेमोक्रेसी (भिभिडि ) का सदस्य रुटेले झण्डै १३ वर्षदेखि प्रधानमन्त्रीको पद सम्हालिसकेका छन्। उनको चौथो गठबन्धन सहितको सरकारले २०२२ को सुरुमा पदभार ग्रहण गरेको थियो तर चार-दलीय गठबन्धनले शरणार्थीहरूका लागि पारिवारिक पुनर्मिलन सम्बन्धी सम्झौतामा पुग्न असफल भए पछी शुक्रबार साँझ विघटन भएको थियो ।
सोमबार हेगमा बोल्दै, रुटेले आगामी निर्धारित आम चुनावमा उम्मेदवारको रूपमा उम्मेदवार नउठ्ने पुष्टि गरे। उनले भने, ‘चुनावपछि नयाँ सरकार गठनको अवसरमा म राजनीति छोड्छु।’
रुटे आमनिर्वाचन नभएसम्म अन्तरिम रूपमा पदमा रहने भए पनि अहिले उनको पद खतरामा छ । दुई वामपन्थी समूह र गीर्ट वाइल्डर्सको अति दक्षिणपन्थी पार्टी फर फ्रीडमलगायत विपक्षी दलहरूले उनीविरुद्ध अविश्वासको प्रस्ताव पेस गरेका छन्। अविश्वासको प्रस्ताव सफल हुनको लागि रुटेको गठबन्धन भित्रका कम्तिमा एक दलले समर्थन गर्नुपर्छ।
राजनीतिबाट रुटेको प्रस्थानले युरोपभरका नेताहरूको ध्यान तानेको छ। बेल्जियमका प्रधानमन्त्री अलेक्ज्याण्डर डे क्रोले आफ्नो कृतज्ञता व्यक्त गर्न ट्वीटरमा लेखेका छन्, “सबै कुराको लागि धन्यवाद, मार्क। नेदरल्यान्ड्सले मात्र नभई अरुले पनि तपाईलाई सम्झनेछ।”
रुटेको राजनीतिबाट सन्यास र आगामी आम चुनाव पछि नेदरल्याण्ड्स आफ्नो राजनीतिक परिदृश्यमा एक नयाँ अध्यायमा प्रवेश गर्दैछ। नयाँ सरकार गठन र प्रमुख नीतिगत मुद्दाहरूलाई सम्बोधन गर्ने नितीले निस्सन्देह नेदरल्याण्ड्सको भविष्यको मार्गलाई आकार दिनेछ।
सत्य, तथ्य र स्वतन्त्र सामूदायिक डिजिटल मिडिया
