भारतको बिहार राज्यका मुख्यमन्त्री नितिश कुमारले पदबाट राजीनामा दिएका छन् । मुख्यमन्त्री नितिश कुमारले मंगलबार राजधानी पटनामा राज्यपाल फागु चौहानलाई भेटेर राजीनामा दिएका हुन् ।
भारतीय जनता पार्टी भाजपा नेतृत्वको नेशनल डेमोक्र्याटिक अलायन्स (एनडीए) सँग उनको केहि समयदेखीको मनमुटाव पश्चात उनले पदबाट राजीनामा दिएका हुन् ।
पार्टीका सबै विधायक र सांसदहरू एनडीए गठबन्धनबाट अलग हुने सबैको इच्छा रहेको भन्दै सांसदहरुसँगको समन्वयमा राजीनामाको निर्णय लिइएको उनले भनेका छन्। गठबन्धनमा सहभागी भारतीय जनता पार्टीसँग मतभेद बढेपछि जनता दल युनाइटेडले मंगलबार बिधायक र सांसदहरूको बैठक बोलाएको थियो ।
उनले अब नयाँ बाटोबाट सरकार बनाउने तयारी गरिरहेको दाबी गरेका छन् । आजतकका अनुसार उनले बिहार विभानसभामा आफूसँग १६० जना विधायकहरुको समर्थन रहेको दाबी गरेका छन् ।
२४३ विधायक रहेको बिहारमा सरकार बनाउन १२२ जनाको समर्थन चाहिन्छ। बिहारमा राजद ७९ सिटसहित सबैभन्दा ठूलो पार्टीका रूपमा रहेको छ । त्यस्तै जदयूको ४५ सिट रहेको छ । त्यस्तै भारतीय कांग्रेसको १९ र वामपन्थी दलहरूको १६ सिट रहेको छ । त्यस्तै भाजपासँग भने ७७ विधायक रहेका छन् । यस्तोमा नीतीशले करिब २ तिहाइ विधायकको समर्थन पाउने देखिन्छ ।
सत्य, तथ्य र स्वतन्त्र सामूदायिक डिजिटल मिडिया
