एसिया कप २०२२ को दोस्रो खेल आज दुबई अन्तर्राष्ट्रिय रंगशालामा भारत र पाकिस्तानबीच सम्पन्न भयो । भारतका कप्तान रोहित शर्माले टस जितेर पहिले बलिङ गर्ने निर्णय गरेका थिए ।
पहिले ब्याटिङ गरेको पाकिस्तानले १९.५ ओभरमा १० विकेट गुमाएर १४७ रन बनाएको थियो । भारतीय फास्ट बलरले सबै १० विकेट आफ्नो नाममा लिए । जवाफमा भारतले १४८ रन बनाएर खेल ५ विकेटले जित्यो । भारतका लागि रविन्द्र जडेजा र हार्दिक पाण्ड्याले खेल जित्ने इनिङ्स खेलेका थिए ।
टस हारेर पहिले ब्याटिङ रोजेको पाकिस्तानको सुरुवात खासै रहेन । पाकिस्तानलाई पहिलो झटका १५ रनको स्कोरमा लाग्यो । तेस्रो ओभरको चौथो बलमा कप्तान बाबर आजम ९ बलमा १० रन बनाएर आउट भए । त्यसपछि छैटौं ओभरको अन्तिम बलमा फखर जमानको विकेट खस्यो । उनले ६ बलमा १० रन बनाए । १३ औं ओभरको पहिलो बलमा पाकिस्तानलाई तेस्रो झटका लाग्यो । इफ्तिखार अहमद २२ बलमा २८ रन बनाएर प्याभिलियन फर्किए । त्यसपछि मोहम्मद रिजवानले ४३, खुशदिल शाहले २ रन, मोहम्मद नवाजले १, शादाब खानले १०, नसिम शाहले शून्य, शाहनवाज दहनीले १६ र आसिफ अलीले ९ रन बनाए । हरिस रउफ १३ रनमा अविजित रहे ।
भारतका लागि भुवनेश्वर कुमारले २६ रनमा ४, हार्दिक पाण्ड्याले २५ रनमा ३, अर्शदीप सिंहले २ र आवेश खानले १ विकेट लिए ।
१४८ रनको लक्ष्य पछ्याएको भारतको सुरुवात खराब रह्यो । ओपनर केएल राहुल पहिलो ओभरको दोस्रो बलमा नै डेब्यु खेलाडी नसिम शाहको शिकार बने । राहुलले खाता पनि खोल्न सकेनन् । आठौं ओभरको अन्तिम बलमा भारतलाई दोस्रो झटका लाग्यो। कप्तान रोहित शर्मा १८ बलमा १२ रन बनाएर आउट भए । १० औं ओभरको पहिलो बलमा भारतलाई तेस्रो झटका लाग्यो । उत्कृष्ट लयमा देखिएका विराट कोहली ३४ बलमा ३५ रन बनाएर क्याच आउट भए । यसपछि सूर्यकुमार यादवले १८ बलमा १८ रन बनाए । पाकिस्तानका लागि मोहम्मद नवाजले २ तथा नसिम शाहले २ विकेट लिएका थिए ।
सत्य, तथ्य र स्वतन्त्र सामूदायिक डिजिटल मिडिया
