अफगानिस्तान र पाकिस्तानबीचको एसिया कप टी–२० खेलमा निकै विवाद भएको छ । सुरुमा दुवै देशका खेलाडी एकअर्कासँग भिड्दै थिए । यसपछि अफगानिस्तान र पाकिस्तानका समर्थकहरुबीच बिबाद भै रंगशालामा भीषण भिडन्त भएको थियो । अफगानिस्तान र पाकिस्तानका दर्शकहरूले आपसमा कुटपिट गरे र त्यहाका कुर्सीहरू तोडफोड गरेका थिए ।
यो विवाद किन सुरु भयो भन्ने भिडियो सार्वजनिक भएको छ । एक पाकिस्तानी दर्शकको यो डान्सपछि अफगानिस्तान र पाकिस्तानी फ्यानबीच झगडा सुरु भएको सामाजिक सञ्जालमा दाबी गरिएको छ । यो भिडियो एक पाकिस्तानी फ्यानको डान्सको हो । भिडियोमा एकजना पाकिस्तानी फ्यानले जितपछि नाच्दै टाढा रहेका अफगान दर्शकलाई जिस्काएको देख्न सकिन्छ ।
यो डान्स देखेर मात्र अफगानिस्तानका फ्यानहरु रिसाएर झगडा गर्न थालेका हुन् भन्ने सामाजिक संजालका प्रयोगकर्ताहरुको दाबी रहेको छ । तर, यस दाबीको पुष्टि हुन् सकेको छैन । दुवै देशका दर्शकबीच भएको झडपको भिडियो पनि सामाजिक सञ्जालमा निकै भाइरल भइरहेको छ । सो क्रममा अफगानिस्तानका फ्यानले रंगशालाका कुर्सीहरू बाहिर निकालेर दौडिएर पाकिस्तानी फ्यानलाई प्रहार गरेका थिए । रंगशालाबाहिर पाकिस्तानी फ्यानसँग झगडा पनि भएको थियो ।
अब यस विषयमा शारजाह प्रहरीसँग छानबिनको माग गरिएको छ । सोही क्रममा अफगानिस्तानका फास्ट बलर फरीद अहमद र पाकिस्तानी ब्याट्सम्यान आसिफ अलीबीच खेलकै दौरानमा पनि सामान्य छेडचाड भएको थियो । फरीदले आसिफलाई आउट गर्दै मैदान छोड्न संकेत गरेपछि आसिफले जवाफमा फरीदलाई धकाल्दै ब्याट देखाएका थिए । अन्तत: अम्पायरले सम्भाव्य झगडा हुनबाट जोगाएका थिए ।
एसिया कपको सुपर–४ राउण्डमा बुधबार (सेप्टेम्बर ७) पाकिस्तानले अफगानिस्तानलाई एक विकेटले पराजित गरेको छ । यो जितसँगै उसले फाइनलमा आफ्नो स्थान पक्का गरेको छ । फाइनलमा पाकिस्तानले श्रीलंकाको सामना गर्नेछ । पहिले ब्याटिङ गरेको अफगानिस्तानले २० ओभरमा ६ विकेट गुमाएर १२६ रन बनाएको थियो । जवाफमा पाकिस्तानले १९.२ ओभरमा ९ विकेटको क्षतिमा लक्ष्य पछ्यायो । फाइनल खेल सेप्टेम्बर ११ मा दुबईमा हुनेछ ।
सत्य, तथ्य र स्वतन्त्र सामूदायिक डिजिटल मिडिया
