सिंगापुरका यातायात मन्त्री एस ईश्वरन भ्रष्टाचारको आरोपमा पक्राउ परेका छन्। मन्त्री ईश्वरन र मलेसियाका धनाड्य ब्यापारी ओङ बेङ सेङको भ्रष्टाचारको आरोपमा चलिरहेको अनुसन्धानलाई सार्वजनिक गर्दै अख्तियार दुरुपयोग अनुसन्धान ब्यूरो ( सीपीआईबी) ले शुक्रबार पक्राउ गरेको जनाएको हो। थप अनुसन्धानका लागि दुवै जनालाई धरौटीमा रिहा गरिएको बताइएको छ ।
अर्बपति व्यापारी ओङ बेङ सेङको गिरफ्तारी सुरुमा उनको कम्पनी होटल प्रोपर्टीज लिमिटेडले खुलासा गरेको थियो । अनलाईन सिटिजन एशिया समाचार एजेन्सीले अर्बपति व्यापारी ओङ बेङ सेङले मुख्य रूपमा सन् २०२२ मा आयोजना गरेको कार्यक्रम ‘सिंगापुर ग्राण्ड प्रिक्स’ को बारेमा सीपीआईबीले गरी रहेको अनुसन्धानका सम्बन्धमा चलेको हल्लासँग सम्बन्धित जोडिएको समाचार प्रकाशित गरेपछि यो खुलासा भएको हो ।
सीपीआईबीले गोप्य राखेर गरेको अनुसन्धानको बारेमा विशेष विवरण प्रदान गरेको छैन।
समाचार अनुसार, उनीहरुको जमानत शर्त सहित स्वीकृत गरिएको छ। मन्त्री ईश्वरन र ओंग बेंग सेङ दुबै को पासपोर्ट ब्यूरोले कब्जा गरेको छ। यद्यपि, ब्यूरोले भनेको छ कि जमानतमा रहेका व्यक्तिहरूले विदेश यात्राको लागि अनुमति अनुरोध गर्न सक्छन्, जसलाई केस-दर-केस आधारमा मूल्याङ्कन गरिनेछ।
ओङ बेङ सेङको विदेश यात्राको अनुरोध ब्यूरोले स्वीकृत गरेको छ, तर उनको जमानतको रकम बढाएर सिङ्गापुर डलर १ लाख गरिएको छ। मन्त्री ईश्वरनको जमानतको रकम भने ब्यूरोले खुलाएको छैन।
ओङ विदेश यात्राबाट फर्केपछि उनले सीपीआईबीमा रिपोर्ट गर्नु पर्नेछ र एजेन्सीले निर्देशन दिए अनुसार आफ्नो पासपोर्ट बुझाउनु पर्नेछ ।
मन्त्री ईश्वरन र ओङ बेङ्ग सेङ दुवै देशका प्रमुख व्यक्तित्व भएकाले यो प्रकरणले सिंगापुरमा निकै हल्ला फैलाएको छ। ओङ, होटल प्रोपर्टीजका संस्थापक र धेरै व्यवसायहरूमा संलग्न छन्। उनीसंग १. ७ बिलियन सिङ्गापुर डलर बराबरको कुल सम्पत्ति रहेको बताइन्छ । फोर्ब्सको रिपोर्ट अनुसारे उनी र उनकी श्रीमती क्रिस्टिना अगस्ट २०२२ मा सिंगापुरको ५० धनी सूचीमा २५ औँ स्थानमा थिए।
यी उच्च व्यक्तित्वहरू संलग्न भ्रष्टाचार मुद्दाको वास्तविक प्रकृति र विवरणहरू अझै अज्ञात छन्। राष्ट्रको ध्यानाकर्षण भएको यस प्रकरणको अनुसन्धानको खुलासाका लागि जनताहरु उत्सुकतापूर्वक पर्खिरहेको बताइन्छ ।
(एजेन्सीहरुको सहयोगमा)
सत्य, तथ्य र स्वतन्त्र सामूदायिक डिजिटल मिडिया
