आर्थिक वर्ष २०७९/८० मा रुपन्देहीमा दुई सयभन्दा बढी उद्योग बन्द भएका छन् । घरेलु तथा साना उद्योग कार्यालय भैरहवाका अनुसार जिल्लामा २ सय १७ उद्योग जस मधे –८४ उत्पादनमूलक उद्योग, १९ कृषि तथा वनजन्य उद्योग , ६३ सेवामूलक उद्योग र ५१ पर्यटन उद्योग बन्द छन् ।
लोडसेडिङ, आर्थिक संकट, बैंकको उच्च ब्याजदरलगायतका कारणले उद्योग बन्द भएको उद्योगीले बताएका छन् । बन्द भएका अधिकांश उद्योग तिलोत्तमा नगरपालिका, सिद्धार्थनगर नगरपालिका र बुटवल उपमहानगरपालिकाका रहेका छन् ।
रुपन्देही उद्योग वाणिज्य सङ्घका अध्यक्ष माधव पौडेलले एक वर्षमा दुई सयभन्दा बढी उद्योग बन्द हुनुले जिल्लाका उद्योगीहरूको अवस्था देखाएको बताएका छन् । उनले कोभिड–१९ को महामारीका कारण कर्जाको उच्च ब्याजदर र आयात–निर्यातमा नीतिगत अवरोधका कारण साना उद्योग बन्द भएको बताए ।
बुटवल उद्योग वाणिज्य संघका अध्यक्ष एवं नेपाल उद्योग वाणिज्य महासंघका केन्द्रीय सदस्य उज्ज्वल कसजुले बैंक कर्जाको उच्च ब्याजदर, बजार समस्या र विमानस्थल पूर्णरुपमा सञ्चालन नहुनु प्रमुख कारण रहेको बताए । उद्योग बन्द भएकाले केही ठूला उद्योगले उत्पादन क्षमता २५ देखि ४० प्रतिशतमा सीमित गरेर खर्च व्यहोरिरहेको उनले बताए ।
घरेलु तथा साना उद्योग कार्यालय भैरहवाका सूचना अधिकारी नेत्रप्रसाद भुसालका अनुसार जिल्लामा घरेलु अन्तर्गत करिब एक हजार ३० उद्योग दर्ता भएका छन् ।
रुपन्देहीको तिलोत्तमा नगरपालिका–८ स्थित ‘आमाको भान्सा’ मसला उद्योग करिब छ महिनादेखि बन्द छ । उद्योगका सञ्चालक ज्ञानेन्द्र बञ्जाडेले बाँकी रहेको कच्चा पदार्थ र मेसिन घरमै लगेर थन्क्याए बस्नुपरेको बताएका छन् । उनले पछिल्लो समय उद्योगको लागि भारतबाट आउने कच्चा पदार्थ जिराको चरम मूल्यवृद्धि, अवैध तरिकाबाट आउने अन्य मसलासँग प्रतिस्पर्धा गर्न बजारमा सकस भएपछि बन्द गर्नुपरेको दुःख व्यक्त गरे ।
उनी जस्तै युवा उद्योगी विष्णुप्रसाद घिमिरेले सञ्चालन गरेको आभास चिया उद्योग करिब एक वर्षदेखि बन्द छ । उद्योगले रुपन्देहीको तिलोत्तमाकै चिया ब्रान्डिङ गरेर बजारमा पुर्याउँदै आएको थियो ।
सत्य, तथ्य र स्वतन्त्र सामूदायिक डिजिटल मिडिया
