नेपाल सरकारले कोरोना महामारीका कारण चीन जान नपाई नेपालमै रोकिएका विद्यार्थीलाई चीन पठाउने प्रक्रिया अगाडि बढाएको छ । यसअघि कोरोना महामारीका कारण चीनबाट नेपाल फर्किएका विद्यार्थीहरु लकडाउनले गर्दा चीन जान नपाई नेपालमै रोकिएका थिए ।
सन् २०२० मै नेपाल आएका २८१ विद्यार्थीलाई अध्ययनका लागि पुनः चीन पठाउने प्रक्रिया सुरु गरेको शिक्षा विज्ञान तथा प्रविधि मन्त्रालयका सहसचिव डा. कमल पोखरेलले संचारमाध्यमलाई जानकारी दिएका हुन । मन्त्रालयले यसअघिनै स्वदेश फर्किएका नेपाली विद्यार्थीलाई उनीहरुको अध्ययनमा निरन्तरता दिन भिसा प्रक्रियाका लागि समेत निवेदन दिन भनेको थियो ।
सरकारले निवेदनकै आधारमा स्वदेश फर्किएका नेपाली विद्यार्थीलाई चीन पठाउने छ । सरकारको निर्णयले दुई बर्षदेखि रोकिएका विद्यार्थीलाई राहत मिलेको छ । चीनको वुहानमा कोभिड–१९ सुरु भएपछि नेपाल सरकारले पहिलो चरणमा १७५ नेपाली विद्यार्थीलाई उद्दार गरी नेपाल ल्याएको थियो ।
सत्य, तथ्य र स्वतन्त्र सामूदायिक डिजिटल मिडिया
