अफगानिस्तानमा तालिबान नेतृत्वको सरकारले अर्को सूचना जारी नभएसम्म महिला विद्यार्थीलाई विश्वविद्यालयहरूमा प्रवेश गर्न निषेध गरेको छ । अफगानिस्तानको शिक्षा मन्त्रालयले देशका सार्वजनिक र निजी विश्वविद्यालयहरूमा तुरुन्तै महिला विद्यार्थीहरूको प्रवेश रोक्न एक पत्र जारी गर्दै मंगलबार निर्देशन दिएको हो ।
मंगलबार तालिबानद्वारा सञ्चालित उच्च शिक्षा मन्त्रालयले अर्को सूचना नभएसम्म महिलाहरूलाई विश्वविद्यालय शिक्षामा प्रतिबन्ध लगाउने निर्णय गरेको थियो। ‘अर्को सूचना जारी नभएसम्मका लागि महिला शिक्षा स्थगन गर्ने उल्लेखित आदेशलाई तुरुन्त कार्यान्वयन गर्न सबैलाई जानकारी गराइन्छ,’ शिक्षामन्त्री नेदा मोहम्मद नदीमको हस्ताक्षर रहेको पत्रमा उल्लेख छ ।
विश्वविद्यालयमा महिला विद्यार्थीलाई प्रतिबन्ध लगाउने अफगान सरकारको विश्वभरि नै व्यापक निन्दा भएको छ।
साउदी अरेबिया र कतारले बुधबार तालिवान नेतृत्वको अफगान प्रशासनलाई विश्वविद्यालयमा महिला विद्यार्थीलाई प्रतिबन्ध लगाउने निर्णय फिर्ता लिन आग्रह गरेका छन्।
एक विज्ञप्तिमा, साउदी विदेश मन्त्रालयले “अफगान कार्यवाहक सरकारले अफगान महिलाहरूलाई विश्वविद्यालय शिक्षाको अधिकार अस्वीकार गर्ने निर्णयमा आश्चर्य र खेद व्यक्त गरेको छ।”
साउदी विदेश मन्त्रालयले तालिबानलाई प्रतिबन्ध “उल्टाउन” आग्रह गरेको छ ।
यसको पक्षमा, कतारको विदेश मन्त्रालयले प्रतिबन्धप्रति “गहिरो चिन्ता र निराशा” व्यक्त गरेको छ।
मन्त्रालयले जारी गरेको विज्ञप्तिमा तालिबान प्रशासनलाई “महिलाको अधिकार सम्बन्धी इस्लामिक धर्मको शिक्षा अनुरूप आफ्नो निर्णय पुनरावलोकन गर्न” आग्रह गरेको छ।
अफगान महिलाहरूलाई विश्वविद्यालय शिक्षामा लगाएको प्रतिबन्धप्रति तालिबान सरकारको विश्वभरि विशेष गरी संयुक्त राष्ट्र ,अमेरिका, टर्की र अन्य देशहरूबाट व्यापक निन्दा भएको छ ।
सत्य, तथ्य र स्वतन्त्र सामूदायिक डिजिटल मिडिया
