भारत स्थित पञ्जाबको पटियाला सहरका कुनै समय बन्धक मजदुरका रूपमा काम गर्ने कुकु राम नाम गरेका सफाई कर्मचारी (स्वीपर) ले जे गरे त्यो सयौं मानिसहरूका लागि प्रेरणा बनेको छ । गरिबी, सरसफाई र अनेकौ समस्याहरुबाट बाहिर आएका कुकुरामले ५३ वर्षको उमेरमा ‘मिस्टर वर्ल्ड’को उपाधि जितेका छन् । गत डिसेम्बरमा थाइल्याण्डमा भएको ३९औँ अन्तर्राष्ट्रिय शारीरिक सुगठन प्रतियोगितामा ५० वर्षभन्दा बढी उमेर समूहमा दलित कुकु रामले स्वर्ण पदक जितेका हुन् । उनी पटियाला अदालतमा ९ हजार रुपैयाँमा स्वीपरको काम गर्छन् ।
कुकुको जीवन अत्यन्त गरिवीका साथ् बितेको थियो । उनले बाल्यकालदेखि नै कठिनाइको सामना गर्नुपरेको थियो । उनी यति गरिब परिवारका थिए कि उनले रु ३ हजारको पारिवारिक ऋण तिर्न पढाइ छाड्नुपरेको थियो । स्कुल छाडेर काम गर्न थाले । कुकुले पटियालाको एक डेरी मालिकसँग ६ वर्षसम्म बन्धक मजदुरको रूपमा काम गरेका थिए । त्यहा उनी बस्न र खान मात्र पाउथे । त्यहाबाट उनी भागेका थिए ।
बाँधिएको मजदुरीको जीवनबाट बाहिर आएर कुकुले जीविकोपार्जनका लागि रिक्सा चलाउनुपरेको थियो । दिनरात रिक्सा चलाएर थोरै कमाई गरेर परिवार पाल्ने गर्थे । नगरपालिकामा सफाइ कर्मचारीको अस्थायी जागिर पाएपछि कुकुले त्यहा काम गर्न थाले । उनले नगरपालिकामा १५ वर्षदेखि अस्थायी सफाई कर्मचारीका रुपमा काम गरेका थिए । अस्थायी कर्मचारीलाई स्थायी बनाउन ठूलो रकम घुस दिनु पर्ने र घुस दिन आफूसँग पैसा नभएकाले अस्थायी सफाई कर्मचारीको जागिर गुमाउनुपरेको कुकुले संचार माध्यमलाई बताएका छन् ।
कुकुरामले सफाई कर्मचारीको अस्थायी जागिर गुमाएपछि उनलाइ घर परिवार धान्न कठिन हुन थाल्यो। त्यसपछि उनी घरबाट २५ किलोमिटर टाढा राजपुराको अदालत परिसरमा जागिर खान पुगेका थिए । तर, उनले आफ्नो शारीरिक कसरत कहिल्यै छोडेनन् । उनको जीवन परिवर्तन भयो र उनी मिस्टर वर्ल्ड २०२२ बने।
गाईवस्तुको हेरचाह गर्ने र आमालाई गोबरको गुइठा छतमा पुर्याउन सहयोग गरेर आफ्नो शरीर निर्माणको यात्रा सुरु भएको कुकु बताउँछन् । समय बचाउनका लागि ठूला-ठूला जालीमा गोबर माटो भर्ने र वर्षौंसम्म बोक्न थालेपछि मांशपेशी बनाउन सफल भएको उनी बताउछन । डेरी मालिकहरूले पनि पौष्टिक खाना खुवाउने गरेको उनी स्मरण गर्दछन ।
कुकुले सन् १९९२ मा रिक्सा चलाएर दिनको ७० रुपैया पाउथे । उनी १६ वर्षको हुदा केसर पहलवानको अखाडामा सामेल भएको , तर महँगो शुल्कका कारण छोड्नु परेको स्मरण गर्दछन । केही अदालतका कर्मचारी र वकिलहरूले उनलाई थाइल्याण्डमा भएको विश्व च्याम्पियनसिपमा भाग लिन मद्दत गरेका थिए ।
(श्रोत: भिडियो अन्तरबार्ता )
सत्य, तथ्य र स्वतन्त्र सामूदायिक डिजिटल मिडिया
