अन्ततः, विपक्षी रिपब्लिकन पार्टीका उम्मेदवार केभिन म्याकार्थी अमेरिकी संसदको तल्लो सदन हाउस अफ रिप्रिजेन्टेटिभ्सको ५५ औँ सभामुख निर्वाचित भएका छन् । शुक्रबार मध्यरातमा भएको ऐतिहासिक १५ औं चरणको मतदानमा ५७ वर्षीय म्याकार्थी निर्वाचित भएका हुन् । उनले न्यान्सी पेलोसीबाट पदभार ग्रहण गरेका छन् । यससँगै अमेरिकामा केही दिनदेखि चलिरहेको राजनीतिक अस्थिरताको अन्त्य हुने अपेक्षा गरिएको छ ।
म्याकार्थीले डेमोक्रेटिक पार्टिका हाकिम सेकोउ जेफ्रीसलाई पराजित गरेका हुन् । नोभेम्बर ८ मा भएको मध्यावधि निर्वाचनमा डेमोक्रेटिक पार्टीले बहुमत गुमाएको थियो । ४३५ सदस्यीय प्रतिनिधि सभामा डेमोक्रेटिक पार्टीको सिट घटेर २१२ पुग्यो भने रिपब्लिकन पार्टीको सिट बढेर २२२ पुग्यो। यसपछि पेलोसीले सभामुख पद छाड्ने इच्छा व्यक्त गरेकी थिइन् ।
रिपब्लिकनहरूले ११८ औं कांग्रेसको नयाँ सत्रमा डेमोक्र्याटहरू भन्दा २२२ -२१२ को पातलो मत अन्तर राखेका छन्, जसमा एक सिट रिक्त रहेको छ ।
यसअघि बिहीबार भएको मतदानका क्रममा एउटा रोचक घटना सार्वजनिक भएको थियो, जसमा पुरै सदन हाँसेको थियो । भोटिङमा पूर्व अमेरिकी राष्ट्रपति डोनाल्ड ट्रम्पलाई एक भोट मात्र पाएको भन्दै खिल्ली उडाइएको थियो । ट्रम्पलाई एकमात्र भोट फ्लोरिडाका रिपब्लिकन म्याट गेट्जले दिएका थिए । ११ औं चरणको मतदानमा गेट्जले औपचारिक रूपमा ट्रम्पलाई हाउस स्पीकरका लागि मनोनयन गरेका थिए ।
अमेरिकी सदनको १६४ वर्षको इतिहासमा पहिलो पटक सभामुखको निर्वाचनमा १५ औं चरणको मतदानको अवस्था सिर्जना भएको हो । सन् १९२३ पछि पहिलो पटक सभामुखको निर्वाचनका लागि बहुचर्चित मतदान भएको थियो ।
सत्य, तथ्य र स्वतन्त्र सामूदायिक डिजिटल मिडिया
