बाँकेको कोहलपुरमा गोलभेंडा दलेर होली मनाइने भएको छ । नेपाल एशोसियशन अफ टुर एण्ड ट्राभल एजेन्टस् (नाट्टा) बाँके च्याप्टरको आयोजना, होटल एशोसियशन अफ नेपाल (हान) बाँकेको सहआयोजना तथा कोहलपुर नगरपालिका र कोहलपुर उद्योग बाणिज्य संघको आगामी २३ फागुन मंगलबार होलीको दिन गोलभेंडा उत्सव नेपाल–२०२३ गर्न लागिएको हो ।
आइतबार कोहलपुरमा आयोजित पत्रकार सम्मेलनमा कोहलपुरलाई पर्यटकीय नगरको रुपमा ब्राण्डिङ्ग गर्न नेपालमै पहिलो पटक गोलभेंडा महोत्सव गर्न लागेको आयोजकले संचार माध्यमलाई बताएका छन् ।
भाइचारा, सद्भाव र रंगहरुको पर्व होली जस्तै देखिने यो गोलभेंडा उत्सवमा स्थानीय किसानहरुले उत्पादन गरेको गोलभेंडाको प्रयोग गरिनेछ । स्पेन, इटली र भारतका केही सहरमा गोलभेंडा उत्सवलाई पर्यटनसँग जोडेर गोलभेंडा पर्व मनाइने गरिन्छ । जहाँ एक आपसमा गोलभेंडा दलेर मनाइने यो पर्व मनाउन विश्व भरीका पर्यटकहरुले आयोजक समक्ष आवेदन समेत दिने गर्छन् ।
यसैबीच, होली -फागुपूर्णिमाको अवसरमा काठमाडौं लैनचौरमा रहेको नेपाल स्काउटको मैदानमा गोलभेंडाको होली मनाइएको छ। ग्लोबल टुरिजम प्रमोसन काउन्सिलले स्पेनमा मनाइने परम्परालाई नेपालमा होलीकै दिन मनाएको जनाएको छ । हरेक वर्ष फागुपूर्णिमामा रङसँगै मनाउने होलीमा विदेशीले मनाउने गोलभेंडा थपिएको हो। हेरौ गोलभेडा होलीका केहि तस्बिर !
(तस्बिर सौजन्य : गोरखापत्र)
सत्य, तथ्य र स्वतन्त्र सामूदायिक डिजिटल मिडिया
