अमेरिकाको सीमा नजिकै उत्तरी मेक्सिकोको एक आप्रवासी केन्द्रमा आगलागी भएको छ । घटना सोमबार राति टेक्सासको एल पासोबाट पर्ने सिउडाड जुआरेजको अध्यागमन केन्द्रमा भएको बताइएको छ। रिपोर्टका अनुसार यस घटनामा करिब ३९ आप्रवासीको मृत्यु भएको छ भने ३० जना घाइते भएको बताइएको छ । यो संख्या अझै बढ्न सक्ने अधिकारीहरुले संचार माध्यमलाई बताएका छन् ।
अमेरिका जाने आप्रवासीहरूका लागि सिउडाड जुआरेज प्रमुख क्रसिङ प्वाइन्ट हो। यहाँ स्थित केन्द्रहरूले अमेरिकामा शरण लिन खोज्नेहरूलाई निर्णय नहुन्जेल राख्ने गर्दछन। आगलागीको घटना भएको केन्द्रमा यस्तै आप्रबासीहरु थिए ।
अखबार डायरियो डे जुआरेजले चिहुआहुआ राज्य अभियोजकको कार्यालयका अज्ञात स्रोतहरूलाई उद्धृत गर्दै एम्बुलेन्सहरू, फायर फाइटरहरू र भ्यानहरू घटनास्थलमा पुगेको बताएको छ । राहत र उद्धार कार्य जारी छ।संचार माध्यमका अनुसार घाइतेहरूलाई चार अस्पतालमा भर्ना गरिएको छ। केही संचार माध्यमहरुले मेक्सिकोको महान्यायाधिवक्ताको कार्यालयले अनुसन्धान सुरु गरेको र अधिकारीहरु घटनास्थलमा रहेको पनि बताएका छन्।
सत्य, तथ्य र स्वतन्त्र सामूदायिक डिजिटल मिडिया
