विश्व प्रसिद्व अमेरिकाको न्यूयोर्क सहर शुक्रबार विश्वको सबैभन्दा खराब बायु गुणस्तर भएको सहरको सूचीमा परेको छ।
IQAir द्वारा संकलित सूची अनुसार आज शुक्रबार यो सामाग्री तयार पार्दाको अवस्थामा , न्यूयोर्क, टोरन्टो, मोन्ट्रियल र वाशिंगटन डीसी विश्वव्यापी प्रदूषणको सूचीमा शीर्ष स्थानमा छन्। क्यानडाको जंगलमा लागेको डढेलोबाट निस्कने कणको भारी मात्राले प्रमुख अमेरिकी सहरहरूमा बाक्लो धुवाँ फैलिएको छ।
क्यानाडाका प्रान्तहरूमा ५०० भन्दा बढी आगो बलिरहेको छ जसको कारण धुवाँले गर्दा पूर्वी क्यानडा र अमेरिकाको मध्यपश्चिम र उत्तरपूर्वलाई असर गरेको छ।
धुवाँको कारण, जनस्वास्थ्य अधिकारीहरूले मास्क वितरण गरेका छन् र मानिसहरूलाई घर भित्रै बस्न सल्लाह दिएका छन्।
१२० मिलियन भन्दा बढी अमेरिकीहरू, जनसंख्याको लगभग एक तिहाइ शुक्रबारसम्म वायु प्रदूषणले प्रभावित भएको बताइन्छ। IQAir को सूचकांकमा १६१ अंक प्राप्त गर्दै “अस्वस्थ बायु ” लाई सङ्केत गर्दै न्यूयोर्कलाई विश्वको सबैभन्दा खराब बायु गुणस्तर भएको सहरको रूपमा स्थान दिइएको छ। टोरन्टो, मोन्ट्रियल, वाशिंगटन डीसी र शिकागो दोस्रो, तेस्रो, चौथो र पाँचौं स्थानमा छन्।
IQAir ले १०० र १५० बीचको हावाको गुणस्तरलाई “संवेदनशील समूहहरूका लागि अस्वस्थ” भनी वर्गीकरण गरेको छ ।
क्यानडाको ओन्टारियो र अमेरिकाको ओहायो नदी उपत्यकाका बासिन्दाहरू: न्यूयोर्क, पेन्सिल्भेनिया, ओहायो, इन्डियाना, केन्टकी, वेस्ट भर्जिनिया र टेनेसीका भागहरूमा हावामा जलिरहेको प्लास्टिकको गन्ध आएको उक्त क्षेत्रका बासिन्दाहरुले रिपोर्ट गरेका छन्। विज्ञहरुका अनुसार यस्तो अवस्था तब हुन्छ जब धुवाँ लामो समयसम्म रहन्छ, जसले गर्दा सूर्यको विकिरणले यसलाई भत्काउँछ र विषाक्त बेन्जिन र फॉर्मल्डिहाइड छोड्छ।
क्यानाडाका प्रधानमन्त्री जस्टिन ट्रुडोले २०२३ को डढेलो सिजनलाई “अभूतपूर्व” र रेकर्डमा सबैभन्दा खराब भएको बताएका छन् । आगोको लागि ट्रुडोले जलवायु परिवर्तनलाई दोषी ठहराए पनि खराब वन व्यवस्थापन र अधिकारीहरूले नियन्त्रणमा जलाउन नसक्नु यी विनाशकारी आगोको आधारभूत कारणहरू भएको आलोचकहरूले तर्क गर्छन्।
सत्य, तथ्य र स्वतन्त्र सामूदायिक डिजिटल मिडिया
