समाचार रिपोर्टहरूका अनुसार, अमेरिकाले युक्रेनलाई क्लस्टर बम आपूर्ति गर्ने निर्णय गरेको छ र जुलाई ७ मा नयाँ सैन्य सहायता प्याकेजको एक भागको रूपमा घोषणा गर्ने अपेक्षा गरिएको छ। युक्रेनका लागि करिब ८० करोड डलर बराबरको सैन्य सहायता प्याकेजमा क्लस्टर हतियारहरू समावेश गरिने अमेरिकी अधिकारीहरूले नाम नछाप्ने सर्तमा खुलासा गरेको समाचार सूत्रहरुले जनाएका छन।
पेन्टागनका प्रवक्ता ब्रिगेडियर जनरल प्याट राइडरले युक्रेनलाई क्लस्टर बम आपूर्ति गर्ने बारेमा एक पत्रकार सम्मेलनमा सोध्दा, तिनीहरूको अस्तित्व स्वीकार गरे तर विशेष विवरणहरू प्रदान गर्न अस्वीकार गर्दै , “आफुसँग यस बारेमा जानकारी दिने केही खास छैन” भने ।
भर्खरका समाचार रिपोर्टहरूले संकेत गरेका छन् कि राष्ट्रपति जो बाइडेनले हतियार प्याकेजमा क्लस्टर हतियारहरू समावेश गर्न सक्रिय रूपमा विचार गरिरहेका छन् ।
पछिल्लो डेढ वर्षदेखि रुससँग युद्ध लडिरहेको युक्रेनको सेनालाई अमेरिकाले घातक क्लस्टर बम उपलब्ध गराउने निर्णय एक विवादास्पद मुद्दा भएको छ । मानवताविरुद्धको क्लस्टर बमको विनाशकारी सम्भावनालाई ध्यानमा राख्दै १२० भन्दा बढी देशले यसलाई प्रतिबन्ध लगाएका छन् । अमेरिकाले जुन बम दिन लागेको छ त्यसलाई १५५ एमएमको तोपबाट पनि प्रहार गर्न सकिने समाचारमा बताइएको छ ।
न्युयोर्क टाइम्सको रिपोर्टका अनुसार अमेरिकी विदेशमन्त्री एन्टोनी ब्लिन्केन स्वयंले युक्रेनलाई क्लस्टर बम दिन सिफारिस गरेका छन् । क्लस्टर बमलाई मानवता विरोधी मानिन्छ र अहिले अमेरिकी निर्णयबाट धेरै प्रश्न उठिरहेका छन् ।
क्लस्टर बम विष्फोट भएपछि त्यसबाट हजारौं साना बम निस्कन्छन् र फराकिलो क्षेत्रमा फैलिन्छन् । यीमध्ये धेरै यस्ता छन् कि विस्फोट हुँदैनन्। जसका कारण त्यहाँ बसोबास गर्ने वा त्यहाँबाट आवतजावत गर्ने आम नागरिक प्रायः यसको सिकार हुने गरेका छन् । यति मात्र होइन, द्वन्द्वकाल र त्यसपछि पनि आम नागरिक मार्ने क्रम जारी रहन्छ । यसको ठूलो उदाहरण क्लस्टर बमले भरिएको अफगानिस्तान हो। संयुक्त राष्ट्र संघ र अफगान सरकारले यी क्लस्टर बमहरू हटाउन मात्र करोडौं रुपैयाँ खर्च गरेको छ।
सन् २००८ मा, १२० भन्दा बढी देशहरूले संयुक्त राष्ट्रको सम्मेलनमा क्लस्टर बमहरू प्रतिबन्ध गर्ने सम्झौतामा हस्ताक्षर गरेका थिए । सम्झौतामा हस्ताक्षर गर्नेमा केही प्रमूख देशहरू छन् (फ्रान्स, बेलायत जस्ता देशहरू) जो युक्रेन र अमेरिकाका प्रमुख सहयोगी हुन्। युक्रेन, अमेरिका र रुस तीनवटै देशले क्लस्टर बममाथि प्रतिबन्ध लगाउने सम्झौतामा हस्ताक्षर गरेका छैनन् । यद्यपि, २००९ मा एक कानून बनाइएको थियो जसले अमेरिकालाई १ प्रतिशत भन्दा बढी असफल हुने क्लस्टर बमहरू निर्यात गर्नबाट रोक्छ। विश्लेषकहरूका अनुसार अमेरिकाको क्लस्टर बमको सम्पूर्ण स्टक यसमा आउँछ।
उता, रुसले क्लस्टर बमहरू प्रयोग गरिरहेको युक्रेनले आरोप लगाउदै आएको छ । यो क्लस्टर बम विमान, क्षेप्यास्त्र र तोपको गोलाबाट प्रहार गर्न सकिन्छ।
सत्य, तथ्य र स्वतन्त्र सामूदायिक डिजिटल मिडिया
