ब्रिटिश अरबपति रिचर्ड ब्रान्सन द्वारा स्थापित अन्तरिक्ष पर्यटन कम्पनी ‘भर्जिन ग्यालेक्टिक’ अन्ततः आफ्नो पहिलो अन्तरिक्ष पर्यटकहरूलाई ब्रह्माण्डको छेउमा पुर्याउन सफल भएको छ , जुन दशकौंको प्रतिज्ञापछि हिजो बिहिबारका दिन पुरा भएको छ ।
बेलायती जोन गुडविन अन्तरिक्षमा यात्रा गर्ने पहिलो ओलम्पियन बनेकाक छन् । टिकट किनेको १८ वर्षपछि उनको अन्तरिक्ष यात्राको पालो आएको थियो । क्यारिबियनको एन्टिगुवाका स्वास्थ्य प्रशिक्षक केइशा शाहफ र स्कटल्याण्डको एबरडीन विश्वविद्यालयमा अध्ययनरत उनकी छोरी अनास्तासिया मायर्स तिन पर्यटक अन्तरिक्ष यात्रामा सहभागी थिए । तीनजना यात्रुबाहेक जहाजमा दुईजना पाइलट सहित ५ जना सवार थिए ।
अन्तरिक्षमा भर्जिन ग्यालेक्टको यो सातौं यात्रा र पहिलो टिकट गरिएको यात्रा हो। सन् २०१८ मा अन्तरिक्ष यात्रा सुरु भएको थियो । यससँगै भर्जिन ग्यालेक्टिकले जेफ बेजोसको ब्लू ओरिजिन र एलोन मस्कको स्पेसएक्ससँगै अन्तरिक्ष पर्यटन व्यवसायमा स्थान बनाएको छ। तिनीहरू मासिक यात्रा प्रस्ताव गर्छन्। हाल करिब ८०० जनाले बुकिङ गरी यात्राको प्रतिक्षामा रहेको कम्पनीका अधिकारीहरुले जानकारी दिएका छन् ।
२००५ मा, जोन गुडविनले भर्जिन ग्यालेक्टिकमा अन्तरिक्ष यात्राको लागि टिकट किनेका थिए। तर, उनको अन्तरिक्ष यात्राको सपना पुरा हुन १८ वर्षसम्म पालो कुर्नु परेको थियो । गुडविन, अहिले ८० बर्षका भए। सन् १९७२ म्युनिख ओलम्पिकमा क्यानोइङमा उनले प्रतिस्पर्धा गरेका थिए । पार्किन्सन्स रोगबाट पीडित, उनले आफ्नो यात्राको उद्देश्य अरूलाई प्रेरित गर्ने बताएका छन् । १८ बर्ष अगाडि बुकिङको समयमा उनको अन्तरिक्ष यात्राको लागत दुई लाख डलर थियो। अब यो बढेर चार लाख पचास हजार डलर भएको छ।
सत्य, तथ्य र स्वतन्त्र सामूदायिक डिजिटल मिडिया
