युक्रेनले आफ्नो सार्वभौमसत्ताको रक्षा गर्ने राष्ट्रको प्रतिबद्धता झल्काउँदै बिहीबार आफ्नो ३२ औं स्वतन्त्रता दिवस मनाएको छ। कीभको सेन्ट सोफिया स्क्वायरको वरिपरि केन्द्रित समारोहमा उल्लेखनियरुपमा युक्रेनीहरुको उपस्थित थियो।
युक्रेनको स्वतन्त्रता दिवसमा राष्ट्रपति भोलोडिमिर जेलेन्स्की र प्रथम महिला ओलेना जेलेन्स्काले कीभको सेन्ट सोफिया स्क्वायरमा आयोजित समारोहमा भाग लिएका थिए । राष्ट्रपतिले सैनिक इकाइहरूलाई राज्य पुरस्कार, दज्र्यानी चिन्ह र मानार्थ नामसहितको रिबनसहितको युद्ध झण्डा प्रदान गरेका थिए।
राष्ट्रपति जेलेन्स्कीले एक सम्बोधनमा आफ्नो राष्ट्रको स्वतन्त्रता जोगाउने संकल्पलाई पूरा गर्ने प्रतिबद्धता जनाए।
“आज हामी सबै युक्रेनको स्वतन्त्रताको ३२औं वार्षिकोत्सव मनाउँदै छौं। अविरल स्वतन्त्रताको ३२ वर्ष, जो टिक्नेछ । जसलाई हामी टुक्राउन दिने छैनौं। र जसमा युक्रेनीहरूले पकड गुमाउने छैनन्, ” जेलेन्स्कीले आफ्नो भाषणमा जोड दिए।
“युक्रेनी राज्यको लामो इतिहासमा, युक्रेनीहरूका पुस्ताहरूले आफ्नो भूमि र स्वतन्त्रताको लागि लडेका छन्, स्वतन्त्रता प्राप्त गरेका छन् र विजय हासिल गरेका छन्, ” उनले अगाडि भने।
“हामीलाई याद छ युक्रेनी जनताले के भोगे। धम्की देख्छौं । हामी दुश्मनसँग लडिरहेका छौं। र हामी जान्दछौं कि हामी के गर्न सक्षम छौं। हामी जित्न सक्षम छौं! र हामी विजयी हुनेछौं! युक्रेनी स्क्वायर र सडकहरूमा युक्रेनी बच्चाहरूले युक्रेनी स्वतन्त्रतालाई उस्तै तरिकाले मनाउनेछन्। हाम्रा नातिनातिनाहरूले मनाउनेछन्। र तिनीहरूका नातिनातिनाहरू समेतले हाम्रो राज्यका साथीहरूसँग सँगै मनाउने छन् ।”
राष्ट्रपति जेलेन्स्कीले भेला भएका युक्रेनीहरुलाई सम्बोधन गर्दै युक्रेनको स्वायत्तता कायम राख्न सक्ने क्षमतामा आफ्नो अटल विश्वास रहेको भनाई राखे । “हामी युक्रेनी स्वतन्त्रतामा हाम्रो पकड गुमाउने छैनौं। हामी सबै यस भावनाद्वारा एकजुट छौं,” जेलेन्स्कीले राष्ट्रलाई एकसाथ बाँध्ने सामूहिक भावनालाई जोड दिँदै घोषणा गरे।
रूस-युक्रेन द्वन्द्वमा साहसपूर्वक भाग लिने युक्रेनी सैनिकहरूलाई राष्ट्रपति जेलेन्स्कीले सम्मान व्यक्त गर्दै व्यक्तिगत रूपमा यी सैनिकहरूलाई राष्ट्रको अखण्डताको रक्षा गर्ने समर्पणप्रति आभार व्यक्त गरेका थिए ।
देशको स्वतन्त्रताको यात्राको स्मरण गर्दै, नष्ट गरिएका रूसी हतियार र सैन्य उपकरणका अवशेषहरू देखाइएको प्रदर्शनी केन्द्रीय ख्रेश्चाटिक स्ट्रीटमा प्रदर्शन गरिएको थियो। उक्त समारोहमा ट्याङ्कहरू, होविट्जरहरू, लडाइँका सवारीसाधनहरू, र क्षेप्यास्त्रका टुक्राहरू प्रदर्शन गरिएको थियो।
तर, युक्रेनीहरुका लागि बिहिबारको दिन चुनौतीरहित थिएन । सम्भावित रुसी ताजा हमलाहरूको चिन्ताले राष्ट्रभरि विभिन्न क्षेत्रहरूमा सार्वजनिक कार्यक्रमहरू निषेध गरिएको थियो । सुरक्षा निकायहरुले आफ्ना नागरिकहरूको भलाइको रक्षा गर्न युक्रेनको निरन्तर प्रतिबद्धतालाई जोड दिएका थिए ।
युक्रेन अगस्त २४ , १९९१ मा सोभियत संघबाट अलग भएको थियो। रुसी छायाँबाट बाहिर आएको सस्मरणमा युक्रेनले अगस्त २४ का दिन आफ्नो स्वतन्त्रता दिवस मनाउदै आएको छ । यो ऐतिहासिक दिनले युक्रेनीहरुको अदम्य भावना र आत्म-निर्णयको खोजीको प्रतीकको रूपमा ठूलो महत्त्व राख्छ।
युक्रेनका जनता लगायत नेताहरुले आफ्नो विगतलाई प्रतिबिम्बित गर्ने र भविष्यतर्फ हेर्दा, ३२औँ स्वतन्त्रता दिवसले राष्ट्रको बल, एकता र कडा संघर्ष बाट प्राप्त गरेको स्वायत्तताको संरक्षण गर्ने अटल प्रतिबद्धता व्यक्त गरेका छन् ।
सत्य, तथ्य र स्वतन्त्र सामूदायिक डिजिटल मिडिया
