पाकिस्तानको उत्तरपश्चिमी खैबर पख्तुनख्वा (केपी) प्रान्तमा बिहीबार राति भएको आत्मघाती आक्रमणमा नौ सैनिकको मृत्यु हुनुका साथै पाँच जना घाइते भएको सेनाले जनाएको छ।
यो हमला बन्नु जिल्लाको जानिखेल क्षेत्रमा भएको थियो, जब एक मोटरसाइकलमा सवार आत्मघाती बम आक्रमणकारीले आफ्नो गाडीलाई सेनाको डिभिजनमा ठोकेको थियो।
यस क्षेत्रलाई सुरक्षा बलहरूले घेरा हालेका छन् र यस क्षेत्रमा फेला परेका कुनै पनि आतंककारीहरूलाई नष्ट गर्न अपरेशन चलिरहेको सेनाले जनाएको छ ।
पाकिस्तानी सेनाले सुरक्षा बलले आतंकवादको खतरा हटाउन कटिबद्ध रहेको र सैनिकको यस्तो बलिदानले संकल्पलाई अझ बलियो बनाउने बताएको छ।
केपी प्रान्तको दक्षिणी वजिरिस्तान जिल्लामा भएको भिडन्तमा छ सैनिक र चार आतङ्ककारीको मृत्यु भएको केही दिनपछि यो आक्रमण भएको हो।
पाकिस्तानका कार्यवाहक प्रधानमन्त्री अनवर उल हक काकरले खैबर पख्तुनख्वा (केपी) प्रान्तको बन्नु डिभिजनमा भएको आतंकवादी हमलाको निन्दा गरेका छन्।
एक ट्वीटमा, काकरले सिपाहीहरूको क्षति “हृदयविदारक” भएको बताएका छन् । उनले आक्रमणलाई “कायरपूर्ण आतंककारी कार्य” भएको भन्दै “पाकिस्तान “यस्ता आतंक विरुद्ध दृढ छ” र सुरक्षा बलहरू त्यस्ता आक्रमणहरूबाट डराउने छैनन्,” काकरले भनेका छन् ।
प्रतिबन्धित आतंकवादी समूह पाकिस्तानी तालिबानले आक्रमणको जिम्मेवारी लिएको छ ।
यस क्षेत्रमा वर्षौंदेखि सक्रिय रहेको उक्त समूहले सुरक्षा बल र सर्वसाधारणमाथि धेरै आक्रमणहरू गरेको छ।
सत्य, तथ्य र स्वतन्त्र सामूदायिक डिजिटल मिडिया
