भारतले एकदिवसीय विश्वकप २०२३ मा लगातार छैटौं जित हात पारेको छ । आज सम्पन्न खेलमा भारतीय टिमले इंग्ल्याण्डलाई १०० रनले पराजित गरेको छ । भारतले २० वर्षपछि विश्वकपमा इंग्ल्याण्डलाई हराएको हो । भारतले पछिल्लो पटक सन् २००३ मा डर्बन मैदानमा ८२ रनले जित हासिल गरेको थियो ।
लखनउको एकना स्टेडियममा टस हारेर ब्याटिङ गरेको भारतीय टोलीले निर्धारित ५० ओभरमा ९ विकेट गुमाएर २२९ रन बनाएको थियो । २३० रनको लक्ष्य पछ्याउन आएको इंग्ल्याण्डको टोली ३४।५ ओभरमा १२९ रन बनाएर अलआउट भएको थियो ।
लखनउको एकना रंगशालामा साविक विजेता इंग्ल्याण्डले टस जितेर फिल्डिङ गर्ने निर्णय गरेको छ । भारतीय टोलीबाट कप्तान रोहित शर्माले सर्वाधिक ८७ रन बनाए । केएल राहुलले ३९ रनको इनिङ खेले । उनीअघि शुभमन गिल ९ रन, विराट कोहली शून्य र श्रेयस अय्यर ४ रन बनाएर आउट भएका थिए ।
इंग्ल्याण्डका डेभिड विलीले ३ विकेट लिए । आदिल रसिद र मार्क वुडले २–२ विकेट लिए ।
भारतीय बलिङका अगाडि इङ्ल्यान्डका ब्याट्सम्यानहरु निरिह बनेका थिए । बलिङतर्फ मोहम्मद शामीले ४ र जसप्रित बुमराहले ३ विकेट लिए । कुलदीप यादव र रविन्द्र जडेजाको स्पिन जोडीले ३ ब्याट्सम्यानलाई प्याभिलियन पठाएको थियो ।
इंग्ल्याण्डलाई १०० रनले पराजित गर्दै भारत अंक तालिकाको शीर्ष स्थानमा पुगेको छ । भारतीय टिमले ६ खेल जितेर १२ अंकसहित नम्बर १ मा छ । अर्कोतर्फ इंग्ल्याण्डको टिम १० नम्बरमा मात्रै छ । इंग्ल्याण्डले यस विश्वकपमा ६ खेलमध्ये एउटा मात्र जितेको छ ।
सत्य, तथ्य र स्वतन्त्र सामूदायिक डिजिटल मिडिया
