काठमाडौं — नेपाली राष्ट्रिय महिला फुटबल टोलीकी स्टार स्ट्राइकर सावित्रा भण्डारी ‘साम्बा’लाई प्रधानमन्त्री राष्ट्रिय प्रतिभा पुरस्कार २०८१ बाट सम्मान गरिएको छ।
प्रधानमन्त्री केपी शर्मा ओलीले शुक्रबार उक्त पुरस्कार साम्बालाई प्रदान गरेका हुन्। हाल व्यावसायिक फुटबल खेलका लागि फ्रान्समा रहेकी साम्बा पुरस्कार लिन उपस्थित हुन सकेकी थिइनन्। उनको अनुपस्थितिमा उनका बुबा कार्यक्रममा उपस्थित भएर पुरस्कार ग्रहण गरेका थिए।
साम्बालाई फुटबलमार्फत् नेपाललाई अन्तर्राष्ट्रिय स्तरमा चिनाएको योगदानका लागि उक्त सम्मान प्रदान गरिएको हो। नेपाली महिला फुटबलमा सर्वाधिक गोलकर्ताको कीर्तिमान राखेकी साम्बाले नेपाललाई थुप्रै अन्तर्राष्ट्रिय प्रतियोगितामा गौरवान्वित तुल्याएकी छिन्।
सावित्रा भण्डारी ‘साम्बा’ : नेपाली फुटबलकी प्रेरणादायी हस्ती
लमजुङ जिल्लाको सानो गाउँबाट उदाएकी सावित्रा भण्डारीले २३ वर्षको उमेरमा नै आफ्नो बाल्यकालको सपना पूरा गरिसकेकी छिन्। सानै उमेरमा छिमेकी केटाहरूको साथमा नांगो खुट्टाले मोजाका टुक्राहरूले बनाइएको बलमा खेल्दै हुर्केकी साम्बाले नेपाली महिला फुटबल टोलीकी स्टारहरू अनु लामा र जमुना गुरुङसँग खेल्ने सपना देखेकी थिइन्।
कीर्तिमानी यात्रा र उपलब्धि
२०१४ मा दक्षिण एशियाली फुटबल महासंघ (साफ) च्याम्पियनसिपमा १७ वर्षको उमेरमा अन्तर्राष्ट्रिय फुटबलमा डेब्यु गरेकी साम्बाले भुटानविरुद्ध खेलमा ८-० को जितमा गोल गर्दै राष्ट्रिय टोलीका लागि आफ्नो खाता खोलिन्। अहिले, २३ वर्षको उमेरमा साम्बा नेपालकी सर्वाधिक गोलकर्ताको कीर्तिमान बनाइसकेकी छिन्। उनले ३८ अन्तर्राष्ट्रिय खेलमा ३४ गोल गरेर अनु लामा र जमुना गुरुङको कीर्तिमानलाई पनि उछिनेकी छिन्।
२०१६ को साफ च्याम्पियनसिपमा उनले १२ गोल गर्दै प्रतियोगिताको सर्वाधिक गोलकर्ता बनिन्। २०१९ मा पनि साम्बाले ५ गोल गर्दै सह-उच्च गोलकर्ता बनेकी थिइन्। त्यसबेला नेपालले घरेलु मैदानमा फाइनल यात्रा तय गरे पनि भारतसँग ३-१ को हार बेहोर्दै उपाधि जित्न चुकेको थियो।
साम्बाको व्यावसायिक फुटबल यात्रा
नेपालमा अपराजेय प्रदर्शन गरेपछि साम्बाले भारतको महिला आई-लिगमा सेतु एफसी र गोक्रम केरला एफसीबाट व्यावसायिक फुटबल खेल्दै आफ्नो प्रतिभा देखाइन्। सेतु एफसीलाई लिग च्याम्पियन बनाउन उनले महत्वपूर्ण भूमिका खेलिन्। गोक्रम केरला एफसीबाट खेलेका क्रममा साम्बाले ३१ गोल गर्दै पाँच ह्याट्रिकसमेत पूरा गरिन् र फेरि लिग च्याम्पियन बनिन्।
हाल साम्बा फ्रान्सको व्यावसायिक क्लब ‘एएस सेंट-इटियेन’ का लागि खेलिरहेकी छिन्। फ्रान्सेली लिगमा खेलेर साम्बाले आफ्नो खेलकौशललाई अझ परिष्कृत गरिरहेकी छिन् र अन्तर्राष्ट्रिय अनुभव बटुल्दैछिन्।
चोटपटक र पुनरागमनको संघर्ष
साम्बाको फुटबल यात्रा संघर्षले भरिपूर्ण छ। २०२१ मा एसीएल (घुँडाको लिगामेन्ट) चोटका कारण उनले करिब एक वर्ष फुटबलबाट विश्राम लिनुपर्यो। तर, अथक मिहिनेत र आत्मबलका साथ साम्बाले पुनरागमन गरिन्। घाइते भएर पनि हिम्मत नहारी मैदान फर्केकी साम्बाको यो संघर्ष नेपाली खेलकुद इतिहासमा प्रेरणादायी उदाहरण बनेको छ।
साम्बाको लक्ष्य र सपना
साम्बा अझै ठूला सपनाहरू बोकेर अगाडि बढिरहेकी छिन्। उनले दक्षिण एशियाली फुटबलमा नेपाललाई च्याम्पियन बनाउन योगदान दिने र भविष्यमा युरोपेली लिगमा खेल्ने लक्ष्य राखेकी छिन्।
“मेरो पहिलो सपना नेपाललाई दक्षिण एसियाली च्याम्पियन बनाउनु हो,” उनले भनिन्। “क्लब स्तरमा भने मलाई युरोपमा खेल्ने चाहना छ। फुटबलले मेरो जीवन नै परिवर्तन गरिदिएको छ। कसैले नचिन्ने मलाई अहिले देशले चिनेको छ। नेपाली फुटबलप्रेमीहरूको विश्वास र आशा ममा छ, र म यो जिम्मेवारी पूरा गर्न तयार छु।”
प्रेरणा र प्रभाव
साम्बा नेपालमा महिला फुटबल खेल्न चाहने युवा खेलाडीहरूको प्रेरणाको स्रोत बनेकी छिन्। उनले देखाएको आत्मविश्वास, मेहनत र समर्पणले नेपाली महिला फुटबलमा मात्र नभई समग्र खेल क्षेत्रमा सकारात्मक ऊर्जा प्रवाहित गरेको छ।
प्रधानमन्त्री तथा मन्त्रिपरिषद्को कार्यालयले प्रदान गर्ने यो पुरस्कार विशिष्ट प्रतिभा प्रदर्शन गर्ने खेलाडी, कलाकार, साहित्यकार तथा विविध क्षेत्रमा योगदान दिने व्यक्तित्वहरूलाई सम्मानस्वरूप प्रदान गरिन्छ। साम्बाले नेपाली फुटबलमा निरन्तर उत्कृष्ट प्रदर्शन गर्दै अन्तर्राष्ट्रिय स्तरमा देशको नाम उचो बनाउँदै आएकी छन्। उनका सफलताहरूले नेपाली महिला फुटबललाई नयाँ उचाइमा पुर्याएको विश्लेषकहरू बताउँछन्।
सत्य, तथ्य र स्वतन्त्र सामूदायिक डिजिटल मिडिया
