कीर्तिपुरस्थित त्रिवि अन्तर्राष्ट्रिय क्रिकेट मैदानमा त्रिकोणात्मक टी–२० सिरिज अन्तर्गत शनिवार भएको खेलमा नेपालले नेदरल्याण्ड्सलाई ६ विकेटले पराजित गरेको छ ।
जितका लागि दिएको १२१ रनको मामूली लक्ष्य पछ्याएको नेपालले १५.२ ओभरमा चार विकेट गुमाएर पुरा गरेको थियो। नेपालको जितमा कप्तान रोहितकुमार पौडेलले सर्वाधिक ४६ रन बनाएका थिए । उनले ३४ बलमा तीन चौका र एक छक्का प्रहार गरेका थिए । त्यस्तै गुलसन झाले ३८ रन, कुशल भुर्तेलले १२ र आसिफ सेखले ८ रन बनाएका थिए ।
नेदरल्याण्ड्सका लागि भिभियन किङ्माले तीन तथा आर्यन दत्तले एक विकेट लिएका थिए ।
यसअघि नेदरल्याण्ड्सले टस जितेर पहिले ब्याटिङ गर्ने निर्णय गरेको थियो र १९.३ ओभरमा १२० रनमा अलआउट भएको थियो ।
नेदरल्याण्ड्सका लागि म्याक्स ओडाउडले २४ बलमा ४ चौका र एक छक्का सहित ३१ रन बनाएका थिए । त्यस्तै टिम भान डर गुग्टेनले २४ रन, रोलोफ भान डेर मर्वेले अविजित २३ र कप्तान स्कट एडवर्ड्सले १८ रन जोडेका थिए ।
नेपालका लागि प्रतिश जिसीले ३ विकेट लिएका थिए भने करण केसी र कुशल मल्लले २/२ विकेट लिएका थिए । त्यस्तै दीपेन्द्र सिंह ऐरीले एक विकेट लिए ।
यो जितसँगै चार खेलमा नेपालले चार अंक जोडदै फाइनलमा पुग्ने सम्भावना बलियो बनाएको छ । त्यस्तै, पहिलो हार बेहोरेको नेदरल्यान्ड्ससंग तीन खेलबाट चार अंक छ ।
नेपाल पहिलो खेलमा नामिबियासँग २० रनले पराजित भएको थियो भने दोस्रो खेलमा नेदरल्याण्डसँग २ रनले पराजित भएको थियो । त्यस्तै तेस्रो खेलमा नेपालले नामिबियालाई ३ रनले पराजित गरेको थियो । भोलि नेदरल्याण्ड्स र नामिबियाबीच खेल हुनेछ ।
सत्य, तथ्य र स्वतन्त्र सामूदायिक डिजिटल मिडिया
