भारतमा डिस्को संगीतलाई लोकप्रिय बनाउन योगदान दिएका बलिउडका चर्चित गायक, संगीतकार बप्पी लहरीको मंगलबार राति विभिन्न स्वास्थ्य समस्याका कारण मुम्बईको जुहुस्थित क्रिटिकेयर अस्पतालमा निधन भएको छ। उनी ६९ वर्षका थिए ।
“डिस्को किङ” भनेर चिनिने दिग्गज बप्पी लहरीले १९८० -९० को दशकमा ‘शराबी’, ‘चलते चलते’, ‘डिस्को डान्सर’, ‘नमक हलाल’ लगायतका चलचित्रहरूमा लोकप्रिय संगीत दिएका थिए । उनको अन्तिम बलिउड गीत २०२० को फिल्म “बाघी 3” को लागि “भंकस” गीत थियो।
उनी संगीत क्षेत्रमा बाहेक सुनको चेन, ब्रेसलेट, औंठी र घडी का सौखिन व्यक्तिका रुपमा पनि परिचित थिए।
बप्पी लहरी भनेर चिनिएका आलोकेश लहरीका बुबा अपरेश लहरी र आमा बाँसुरी लाहिरी दुवै बंगाली संगीतकार थिए। बप्पीले सानै उमेरमा संगीतको दुनियाँमा प्रवेश गरेका थिए र तीन वर्षको हुँदा कलकत्ताको इडेन गार्डेनमा तबला बजाउँदै डेब्यु गरेका थिए। बप्पीले एक अन्तर्वार्तामा लता मंगेशकरले आफ्ना अभिभावकलाई पण्डित समता प्रसादजीकहाँ तालिमका लागि पठाउन आग्रह गरेको खुलासा गरेका थिए ।
धेरै वर्ष उनले संगीत उद्योगमा लता मंगेशकर र किशोर कुमार जस्ता दिग्गजहरूसँग काम गरे।
दिग्गज ‘डिस्को किङ’ बप्पी लहरीको निधनमा सिंगो बलिउड चलचित्र क्षेत्र र उनका फ्यानहरु शोकमा छन् ।
सत्य, तथ्य र स्वतन्त्र सामूदायिक डिजिटल मिडिया
