दक्षिणी जर्मनीको गुन्जबर्ग सहरमा रहेको लेगोल्याण्ड मनोरञ्जन पार्कमा बिहीबार दुईवटा रोलर कोस्टर ट्रेन एकआपसमा ठोक्किएका छन् । उक्त दुर्घटनामा कम्तीमा ३१ जना घाइते भएको स्थानीय सञ्चारमाध्यमले जनाएका छन् । घाइतेहरुको ज्यान जोखिममा नरहेको बताइएको छ ।
कम्तिमा एक व्यक्ति गम्भीर घाइते भएपनि ज्यान जोखिममा नरहेको स्थानीय मिडियाले जनाएको छ।
“फायर ड्र्यागन” रोलर कोस्टरमा घाइते हुनेहरूमा वयस्क र बच्चाहरू भएको प्रहरीले सञ्चारमाध्यमहरूलाई बताएको छ ।
घटनापछि अधिकारीहरूले तीनवटा हेलिकप्टरसहित ठूलो मात्रामा उद्धार कार्य सुरु गरेका जनाइएको छ । स्थानीय सञ्चारमाध्यमहरूका अनुसार मानिसहरूलाई उद्धारका लागि कम्तिमा पाँच मिटर (१६ फिट) को उचाइबाट तल लैजानुपरेको थियो।
दुईवटा रोलर कोस्टर ट्रेन एकआपसमा ठोक्किएको कारण स्पष्ट नभएको तर प्रहरीले भिडियो रेकर्डिङको समीक्षा गरिरहेको बताइएको छ ।
पार्कका अनुसार रोलर कोस्टरले २९ किलोमिटर प्रतिघण्टा (१८ माइल प्रतिघण्टा) को गतिमा यात्रा गर्छ।
२००२ मा खोलिएको लेगोल्याण्ड मनोरञ्जन पार्कमा १० थिम क्षेत्र सहित ६० भन्दा बढी अवलोकन क्षेत्र र राइड छन्।
सत्य, तथ्य र स्वतन्त्र सामूदायिक डिजिटल मिडिया
