संयुक्त राज्य अमेरिकाको संसद भवनमा भएको दंगाको दुई वर्षपछि ब्राजिलमा आइतबार, ८ जनवरी २०२३ मा दक्षिणपन्थी नेताहरू र पूर्व राष्ट्रपति बोल्सोनारोका समर्थकहरूले त्यहाँको संसद, राष्ट्रपतिको भवन र सर्वोच्च अदालत भवनमा आक्रमण गरी हिंसा र अराजकताको त्यस्तै दृश्यहरू देखाएका छन्।
बोल्सोनारोका समर्थकहरूद्वारा लुइज इनासियो लुला दा सिल्भा राष्ट्रपतिको रूपमा निर्वाचित भएको एक हप्ता पछि यो आक्रमण भएको हो।
सामाजिक संजालमा प्रेषित भिडियोहरुका अनुसार बोल्सोनारोका हजारौं समर्थकहरूले भर्खरैको चुनावको नतिजालाई अस्वीकार गर्दै सुरक्षा घेरा तोड्दै , भवनका छतमा चढेर झ्यालहरू भत्काउदै अन्य विनाशकारी गतिबिधिहरु गरेको देखिएको छ।
ब्राजिलको राष्ट्रिय फुटबल टोलीको पहिरन लगाएका प्रदर्शनकारीहरु संसद भवनभित्र रहेको सभामुखको बैठक कोठामा पुगेर तोडफोड गरेका थिए ।
केही घन्टामै प्रहरीले सर्वोच्च अदालत र कांग्रेस भवनहरू पुनः कब्जामा लिएको बताइएको छ।
पूर्व अमेरिकी राष्ट्रपति डोनाल्ड ट्रम्प, क्यानडाका प्रधानमन्त्री जस्टिन ट्रुडो र संयुक्त राष्ट्रका महासचिव एन्टोनियो गुटेरेसलगायत विभिन्न देशका शीर्ष नेताहरूले ब्राजिलमा भएको आक्रमणको निन्दा गरेका छन्।
यसै क्रममा ब्राजिलका नवनिर्वाचित राष्ट्रपति सिल्भाले उक्त हमलालाई मृत्युदण्डको आक्रमण भनेका छन् । आइतबार भएको आक्रमणलाई लिएर विभिन्न टिप्पणी भइरहेका छन् । उनले ट्वीटरमा लेखेका छन्, “उनीहरूले आइतवार मौनताको फाइदा उठाए, जब हामी अझै सरकार स्थापना गरिरहेका छौं, तपाइँलाई थाहा छ कि यस्तो (हिंसात्मक) कार्य गर्न उक्साउने किसिमका भाषण पूर्वराष्ट्रपतिले धेरै गरिसकेका छन् र यो उहाँको जिम्मेवारी र उहाँलाई समर्थन गर्ने दलहरूको पनि हो’।
राष्ट्रपति सिल्भाले संघीय अनुसन्धानका लागि एक आदेशमा हस्ताक्षर गरेका छन् ।
वाशिंगटन पोस्टको रिपोर्ट अनुसार, सर्वोच्च अदालतले गभर्नर र जिल्लाको सार्वजनिक सुरक्षा प्रमुखलाई देशको राजधानीमा अभूतपूर्व आक्रमणमा संलग्न भएको आरोप लगाउँदै तत्काल निलम्बन गर्न आदेश दिएको छ ।
ब्राजिलका सञ्चारमन्त्री पालो पिमेन्टाले प्रदर्शनकारीहरूले राष्ट्रपतिको भवनमा राखिएको हतियार लिएर गएको दाबी गरेका छन् । ट्वीटरमा भिडियो पोस्ट गर्दै उनले आफूहरु संस्थागत सुरक्षा कार्यालय भित्र रहेको र आन्दोलनकारीले घातक र गैरघातक हतियार लिएर गएको दाबी गरेका छन् । सरकारले कति हतियार चोरी भयो भन्ने सार्वजनिक रूपमा उल्लेख गरेको छैन।
राष्ट्रपति चुनावमा लुलाले ५०.९ प्रतिशत मत पाएका थिए भने बोल्सोनारोले ४९.१ प्रतिशत मत प्राप्त गरेका थिए । ७७ वर्षीय वामपन्थी नेता लुलाले कडा प्रतिस्पर्धा भएको चुनावमा दक्षिणपन्थी बोल्सोनारोलाई हराएका थिए ।
(एजेन्सीहरूबाट जानकारी सहित)
सत्य, तथ्य र स्वतन्त्र सामूदायिक डिजिटल मिडिया
