प्रधानमन्त्री पुष्पकमल दाहाल ‘प्रचण्ड’ ले विश्वासको मत पाएका छन् । उनलाई १० पार्टीका २६८ सांसदले विश्वासको मत दिएका छन्। संसद्को सबैभन्दा ठूलो तर सत्ता गठबन्धन र सरकारमा सहभागी नभएको दल नेपाली कांग्रेसले प्रधानमन्त्रीलाई विश्वासको मत दिएको छ ।
मंगलबार भएको मतदानमा २७० सांसदमात्रै सहभागी भएका थिए ।नेपाल मजदुर किसान पार्टीका प्रेम सुवाल र राष्ट्रिय जनमोर्चाका चित्रबहादुर केसीबाहेक सबै दल र स्वतन्त्र सांसदहरूले प्रधानमन्त्री दाहाललाई विश्वासको मत दिएका छन् ।
संविधानको धारा ७६ को उपधारा ४ अनुसार प्रचण्डले मंगलबार संसदमा विश्वासको मत लिएका हुन्। नेकपा (एमाले) सहित अन्य सात दल र स्वतन्त्र गरी १६९ जना सांसदको समर्थनमा प्रचण्ड पुस १० गते प्रधानमन्त्री नियुक्त भएका थिए। प्रधानमन्त्री नियुक्त भएको ३० दिनभित्र विश्वासको मत लिनु पर्ने संवैधानिक व्यवस्था छ।
संसदमा विश्वासको मत लिइसकेपछि अब दुई वर्षसम्म प्रधानमन्त्री प्रचण्डविरूद्ध अविश्वासको मत ल्याउन नपाइने संबैधानिक व्यवस्था छ ।
सत्य, तथ्य र स्वतन्त्र सामूदायिक डिजिटल मिडिया
