भारतको प्रख्यात अदानी समूहका अधिकांश कम्पनीको सेयर घट्ने क्रम आज तेस्रो दिन पनि जारी रह्यो । जसका कारण अदानी समूहलाई तीन दिनमा ६५ बिलियन डलर नोक्सान भएको छ ।
यो गिरावट अमेरिकी अमेरिकी सर्ट सेलिंग कम्पनी हिन्डेनबर्ग रिसर्चले गत हप्ता एक प्रतिवेदन सार्वजनिक गरी अडानी समूह “दशकौँदेखि स्टक हेरफेर र लेखा जालसाजी” मा संलग्न रहेको आरोप लगाएको थियो ।
त्यसपछि गत साता बुधबार र शुक्रबार अदानी समूहका कम्पनीहरूमा ठूलो गिरावट आएको थियो । यीमध्ये केही कम्पनीको सेयर सोमबार पनि घटेको छ । जसका कारण अदानी समूहका कम्पनीहरुको बजार पुँजी ६५ बिलियन डलरले घटेको छ । सेयरमा आएको गिरावटका कारण कम्पनीका अध्यक्ष गौतम अडानीको नेटवर्थमा पनि भारी गिरावट आएको छ । तीन दिनमा उनको सम्पत्ति करिब ३७ बिलियन डलरले घट्यो । फोर्ब्सका अनुसार अदानीको कुल सम्पत्ति आज ८.३ बिलियन डलरले घटेको छ र उनी विश्वका धनी व्यक्तिको सूचीमा आठौं नम्बरमा झरेका छन् ।
अदानी समूहका सूचीकृत दशमध्ये सात कम्पनीको सेयर आज तेस्रो दिन पनि ओरालो लागेको छ । सबैभन्दा बढी गिरावट अदानी टोटल ग्यास र अदानी ट्रान्समिसनको शेयरमा आएको छ । यी कम्पनीको सेयर २० प्रतिशतले घटेर तल्लो सर्किटमा पुगेको छ । अदानी ग्रीन इनर्जीको शेयर पनि १८.११ प्रतिशतले घटेको छ । अदानी पावर, अदानी विल्मर र एनडीटीभी ५ प्रतिशत र अदानी पोर्ट्स १.११ प्रतिशतले घटेका छन् । समूहको प्रमुख कम्पनी अदानी इन्टरप्राइजेज ३.३६ प्रतिशत, एसीसी ०.४८ प्रतिशत र अम्बुजा २.१५ प्रतिशतले बढेको छ ।
फोर्ब्सको रियल टाइम अर्बपतिहरूको सूची अनुसार, अडानीको कुल सम्पत्ति आज ८.३ बिलियन डलरले घटेको छ र उनी धनीहरूको सूचीमा आठौं नम्बरमा झरेका छन्। अहिले उनको कुल सम्पत्ति रिलायन्स इन्डस्ट्रिजका अध्यक्ष मुकेश अम्बानीभन्दा करिब ४ बिलियन डलर बढी छ । अम्बानी अहिले यो सूचीमा १० नम्बरमा छन् । यस सूचीमा फ्रान्सका बर्नार्ड अर्नाल्ट २१३ बिलियन डलरसहित पहिलो नम्बरमा छन् । एलोन मस्क दोस्रो, जेफ बेजोस तेस्रो, ल्यारी एलिसन चौथो, वारेन बफेट पाँचौं र बिल गेट्स छैटौं स्थानमा छन् ।
अडानी समूहले आइतबार कम्पनीले ४१३ पृष्ठको एक वक्तव्य प्रकाशन गरी आफूहरूमाथि “दुराशययुक्त” आक्रमण भएको बताएको छ र हिन्डेनबर्गको दाबीलाई खण्डन गरेको छ । हिन्डेनबर्गले लगाएका आरोपहरू “झूट बाहेक केही नभएको” समूहले बताएको छ ।
“यो केवल कम्पनीमाथि अनावश्यक आक्रमण मात्र नभई समग्र भारत, भारतीय संस्थाहरूको स्वतन्त्रता, अखण्डता र गुणस्तर, र भारतको विकास र महत्त्वाकाङ्क्षा विरुद्धको आक्रमण हो,” समूहको वक्तव्यमा भनिएको छ ।
(एजेन्सीको सहयोग सहित )
सत्य, तथ्य र स्वतन्त्र सामूदायिक डिजिटल मिडिया
