प्रतिनिधि सभाअन्तर्गत चितवन निर्वाचन क्षेत्र नं. २ को उपनिर्वाचन आगामी वैशाख १० गते हुने भएको छ । निर्वाचन अयोगले आइतबार बसेको बैठकले उक्त निर्णय गरेको हो ।
सर्वोच्च अदालतले गत मङ्सिरको चुनावमा उक्त क्षेत्रबाट निर्वाचित रवि लामिछाने अयोग्य भएको आदेश गरेपछि लामिछानेको सांसद पद खारेज भै चितवन –२ मा प्रतिनिधि सभा सदस्य पद रिक्त भएको थियो ।
प्रतिनिधि सभाको कार्यकाल ६ महिनाभन्दा बढी बाँकी छँदै कुनै सदस्यको स्थान रिक्त भएमा त्यस्तो स्थान जुन निर्वाचन प्रणालीबाट पूर्ति भएको थियो सोही प्रक्रियाद्वारा पूर्ति गरिनेछ भन्ने नेपालको संविधानको धारा ८४ को उपधारा ७ मा व्यवस्था छ ।
निर्वाचित कुनै सदस्यको पद प्रतिनिधि सभाको अवधि ६ महिनाभन्दा बढी कायम रहँदै कुनै कारणले रिक्त भएमा आयोगले तोकेको मितिमा त्यस्तो रिक्त सदस्यको पद उपनिर्वाचनद्वारा पूर्ति गरिने व्यवस्था प्रतिनिधि सभा सदस्य निर्वाचन ऐन, २०७४ ले ब्यबस्था गरेको छ ।
उपनिर्वाचन कार्यक्रम यस प्रकार हुने आयोगले जनाएको छ :
- सोमबार फागुन १ गतेदेखि चैत १६ गतेसम्म मतदाता नमावली अद्यावधिक कार्यक्रम सञ्चालन हुने,
- चैत २० गते उम्मेदवारको मनोनयन दर्ता ,
- चैत २१ गते उम्मेदवारको विरोधमा उजुरी दिने ,
- चैत २२ गते मनोनयनपत्र र उजुरी उपर जाँचबुझ गरी निर्णय दिने तथा उम्मेदवारको नामावली प्रकाशन गर्ने ,
- चैत २३ गते उम्मेदवारको नाम फिर्ता र उम्मेदवारको अन्तिम नामावली प्रकाशन गरी उम्मेदवारलाई निर्वाचन चिह्न प्रदान गर्ने
सत्य, तथ्य र स्वतन्त्र सामूदायिक डिजिटल मिडिया
