आईसीसी टि–२० विश्वकप एसिया छनोटको सेमिफाइनलमा नेपालले युनाइटेड अरब इमिरेट्स (यूएई) लाई ८ विकेटले हराएको छ। यो जितसंगै १० वर्षपछि नेपालले विश्वकप खेल्ने पुन अवसर पाएको छ ।
नेपालमा जारी रहेको छनोट प्रतियोगिताको फाइनलमा पुग्ने दुई टिमले आगामी वर्ष अमेरिका र वेस्ट इन्डिजमा हुने विश्वकप खेल्ने छन।यसकालागि नेपाल विश्वकपका लागि छनोट भएको हो ।
शुक्रबार माथिल्लो मूलपानी क्रिकेट मैदानमा यूएईले पहिले व्याटिंग गर्दै १३४ रन बनाएको थियो। यसका जवाफमा नेपालले १७।१ ओभरमा दुई विकेट गुमाएर पूरा गर्यो ।
नेपालको तर्फबाट ओपनर आसिफ शेखले अविजित ६३ रन बनाएका थिए । उनले आक्रमक व्याटिंग गर्दै ५० बलमा ६ चौका र दुई छक्का प्रहार गरेका थिए । यो संगै टि- २० अन्तर्राष्ट्रिय क्रिकेटमा उनले आफ्नो नाममा चौथो अर्धशतक को रेकर्ड बनाएका छन ।
यसैगरी, कप्तान रोहितकुमार पौडेलले ३५ रन, गुल्सन झाले २२ र कुशल भुर्तेलले ११ रनको स्कोर बनाए ।
यूएईका निलान्स केशवानी र बसिल अमिदले एक–एक विकेट लिए ।
टस जितेर पहिले ब्याटिङमा आएको यूएईले २० ओभरमा ९ विकेट गुमाउदै जम्मा १३४ रन बनाएको थियो ।
यूएईका तर्फबाट भ्रित्या अरविन्दले ५१ बलमा आठ चौका र दुई छक्का सहित ६४ रन बनाए ।यसैगरी, कप्तान मुहम्मद वसिमले १६ बलमा तीन चौका र दुई छक्कासहित २६ रन, आलिसान सराफुले १६ र आसिफ खानले १३ रन बनाएका थिए ।
नेपालका तर्फबाट कुशल मल्लले तीन ओभर बलिंग गर्दै ११ रन दिदै तीन विकेट लिएका थिए ।यसैगरी, सन्दीप लामिछानेले दुई विकेट, सोमपाल कामी र रोहित पौडेलले एक एक विकेट लिएका थिए ।
प्रतियोगिताको सेमिफाइनलमा नेपाल समूह ‘ए’ को उपविजेता र यूएई समूह ‘बी’ को विजेताको रूपमा खेलेका थिए । नेपालले अब छनोटको उपाधिका लागि ओमानसँग खेल्ने भएको छ ।
नेपालले यसअघि पछिल्लो पटक सन् २०१४ मा भएको ट्वान्टी–२० विश्वकप खेलेको थियो । त्यसयता विश्वकपका तीन संस्करण आयोजना भए पनि नेपालले छनोट चरण पार गर्न सकेको थिएन ।
सत्य, तथ्य र स्वतन्त्र सामूदायिक डिजिटल मिडिया
