सन् २०२४ को पहिलो दिन नै जापानलाई एक ठूलो भूकम्पले हल्लाएको छ । जापान मौसम विज्ञान एजेन्सी (जेएमए) का अनुसार जापानमा सोमवार ७.४ म्याग्निच्युडको भूकम्प गएको छ । जापानी अधिकारीहरूले उत्तरपश्चिम तटीय क्षेत्रमा सुनामीको चेतावनी दिएका छन। जेएमएले भूकम्प इशिकावा र वरपरका प्रान्तहरूमा गएको जनाएको छ। साथै, जेएमएले पश्चिमी तटीय क्षेत्र निगाटा र तोयामा प्रान्तका लागि सुनामीको चेतावनी जारी गरेको छ।
जापानका धेरै क्षेत्रमा भूकम्पको धक्का महसुस गरिएको जनाइएको छ । सोमबार साँझ ४ बजेर १० मिनेटमा भूकम्प गएको देशको मौसम विभाग- जेएमएले जनाएको छ । भूकम्पको केन्द्रविन्दु इशिकावाको नोटो क्षेत्रको वाजिमाबाट ३० किलोमिटर पूर्व-उत्तरपूर्वमा ३७.५ डिग्री उत्तर अक्षांश र १३७.२ डिग्री पूर्वी देशान्तरमा रहेको थियो। जापानी मौसम एजेन्सीले नोटो क्षेत्रमा ठूलो सुनामीको चेतावनी पनि जारी गरिएको जनाएको छ। जसमा देशको तटीय प्रान्त निगाता, तोयामा र इशिकावाका मानिसहरूलाई तुरुन्तै बाहिर जान भनिएको छ। जापानी सार्वजनिक प्रसारक एनएचकेले समुद्रमा ५ मिटरसम्म छाल उठ्ने चेतावनी दिएको छ ।
द जापान टाइम्सको रिपोर्ट अनुसार राजधानी टोकियो र कान्टो क्षेत्रमा पनि भूकम्पको धक्का महसुस गरिएको थियो । जापानको सरकारी टेलिभिजन एनएचकेका अनुसार सुनामीको चेतावनीपछि ५ मिटरसम्म छाल आउने सम्भावना रहेका कारण मानिसहरूलाई तटीय क्षेत्र छाड्न र उच्च उचाइमा जान आग्रह गरिएको छ। १ मिटरभन्दा अग्लो छालहरू इशिकावाको वाजिमा सहरको तटमा पुगेको एनएचकेले जनाएको छ।
ताजा अपडेट अनुसार, जापान सरकारले सुनामीको उच्च चेतावनी फिर्ता लिएको छ, जुन भूकम्पका कारण सोमबार बिहान जारी गरिएको थियो । तर, उच्च छालको खतराले समुन्द्री किनारमा बसोबास गर्नेहरुलाई तत्काल घर नफर्काउन भनिएको छ ।
जापानको नोटो क्षेत्रमा साँझ ५ बजेसम्म ११ वटा भूकम्प गएको बताइएको छ । भूकम्पपछि आणविक संयन्त्र सञ्चालक टेप्कोले भूकम्प प्रभावित क्षेत्रमा आफ्ना संरचनामा कुनै क्षति भए नभएको अनुसन्धान गरिरहेको छ । यो जापानमा पछिल्ला केही वर्षयताकै शक्तिशाली भूकम्प हो ।
सत्य, तथ्य र स्वतन्त्र सामूदायिक डिजिटल मिडिया
