नेपालमा राजतन्त्र पुनःस्थापनाको चर्चा फेरि चुलिएको छ। आइतबार दिउँसो पोखराबाट काठमाडौं आएका पूर्वराजा ज्ञानेन्द्र शाहलाई उनका समर्थकहरूले भव्य स्वागत गरेका छन्।
त्रिभुवन अन्तर्राष्ट्रिय विमानस्थलको आन्तरिक टर्मिनलमा राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनसहितका नेताहरूले पूर्वराजालाई स्वागत गरे। विमानस्थल बाहिर पनि उनका समर्थकहरू ठूलो संख्यामा उपस्थित थिए।
पूर्वराजाको स्वागतका लागि राजावादी समूहहरूले काठमाडौंमा शक्ति प्रदर्शन गरेका थिए। राजधानीका विभिन्न स्थानबाट आएका समर्थकहरूको जुलुस विमानस्थलसम्म पुगेको थियो। उनीहरूले राजतन्त्रको समर्थनमा नाराबाजी गरेका थिए।
यसरी बढ्दो राजावादी गतिविधिले नेपालमा पुनः राजतन्त्र फर्कने संकेत हो त? पछिल्ला केही महिनादेखि पूर्वराजा ज्ञानेन्द्रको गतिविधि सक्रिय देखिएको छ। विभिन्न धार्मिक तथा सामाजिक कार्यक्रममा उनको उपस्थिति बाक्लो हुँदै गएको छ।
राजनीतिक विश्लेषकहरूका अनुसार, नेपालमा राजतन्त्र पुनःस्थापनाका लागि संविधान संशोधन आवश्यक पर्छ, जसका लागि संसदको दुई-तिहाइ बहुमत आवश्यक हुनेछ। वर्तमान परिस्थितिमा त्यो सम्भावना निकै कठिन देखिन्छ। तर, जनस्तरबाट राजतन्त्रको माग उठ्दै गएमा यसको प्रभाव राजनीतिक वृत्तमा पर्न सक्ने अनुमान गरिएको छ।
यसैबीच, पूर्वराजा ज्ञानेन्द्रले हालसम्म कुनै औपचारिक प्रतिक्रिया दिएका छैनन्। उनका समर्थकहरू भने राजसंस्थाको पुनरागमनको पक्षमा आन्दोलन चर्काउने तयारीमा छन्।
नेपालमा फेरि राजतन्त्र फर्कन्छ कि लोकतान्त्रिक प्रणाली नै बलियो रहन्छ भन्ने विषय आगामी दिनमा स्पष्ट हुँदै जानेछ।
सत्य, तथ्य र स्वतन्त्र सामूदायिक डिजिटल मिडिया
