पहिलो टी–ट्वान्टी सिरिजअन्तर्गतको खेलमा नेपाल जिम्बाब्वे ‘ए’ क्रिकेट टोलीसँग पराजित भएको छ ।
काठमाडौँको कीर्तिपुरस्थित त्रिवि क्रिकेट मैदानमा आज दिउँसो भएको खेलमा जिम्बाब्वेले नेपाललाई ६ विकेटले पराजित गरेको हो ।
पहिले ब्याटिङ गरेको नेपालले निर्धारित २० ओभरमा ५ विकेट गुमाएर १ सय ८१ रन बनाएको थियो । नेपालले दिएको १८२ रनको लक्ष्य जिम्बावेले १८.५ ओभरमा ४ विकेटको क्षतिमा पूरा गरेको थियो।
जिम्बाब्वेका लागि तडिवानाशे मरुमानीले ५६ र टोनी मुनयोङ्गाले ५० रन बनाए । नेपालका बसिर अहमदले २ तथा सन्दीप लामिछाने र करन केसीले १–१ विकेट लिए ।
नेपालका तर्फबाट मोहम्मद आदिल आलमले नटआउट ४७ र कुशल भुर्तेलले ४६ रन बनाए । आलमले २७ बलमा ३ छक्का र ४ चौका प्रहार गर्दैँ ४७ रन जोडे ।
कुशलले ३१ बलमा ८ चौका प्रहार गर्दैँ ४६ रन जोडे । नेपालले र जिम्बाब्वेबीचको दोस्रो टी–ट्वान्टी खेल भने सोमबार हुनेछ ।
अमेरिकामा आयोजना हुने आईसीसी क्रिकेट विश्वकप लिग टुअन्तर्गत त्रिकोणात्मक एकदिवसीय सिरिजको तयारी स्वरुप नेपालले जिम्बावे ‘ए’ टोलीसँग सिरिज खेलिरहेको हो । तयारी सिरिजमा नेपाली र जिम्बाब्वे ‘ए’ बीच ३ एकदिवसीय तथा ३ टी–ट्वान्टी खेल्ने तय भएको छ ।
सत्य, तथ्य र स्वतन्त्र सामूदायिक डिजिटल मिडिया
