नेपाल सरकारले डिजेल र पेट्रोलको मूल्य एकै पटक प्रतिलिटर १० रुपैयाँले बढाएको छ । नेपाल आयल निगम सञ्चालक समितिको बैठकले शनिवार मध्यरात १२ बजेदेखि लागू हुने गरी मूल्य बढाएको जनाएको छ ।
निगमले जारी गरेको बिज्ञप्ति अनुसार पेट्रोलको मूल्य प्रतिलिटर १ सय ७० र डिजेलको मूल्य प्रतिलिटर १ सय ५३ रुपैयाँ पुगेको छ । यसैगरी, खाना पकाउने एलपी ग्यास र हवाई इन्धनको मूल्य भने यथावत् रहेको नेपाल आयल निगमले बिज्ञप्तिमा जनाएको छ ।
नेपाल आयल निगमले एकैपटक पेट्रोल र डिजेलको मूल्य १०–१० रूपैयाँ बढाउनु परेको कारणमा अन्तर्राष्ट्रिय बजारमा कच्चा तेलको मूल्यसँगै प्रशोधित तेलको मूल्य निरन्तर बढ्दै गएको उल्लेख गरेको छ।
मूल्य बढाएपछि पनि नेपाल आयल निगमलाई पेट्रोलमा प्रतिलिटर १४ दशमलव ३६ रुपैयाँ र डिजेलमा प्रतिलिटर ३१ दशमलव ४४ रुपैयाँ घाटा रहेको निगमले जनाएको छ ।
त्यस्तै , खरिद लागत यथावत रहने हो भने मूल्य समायोजन पश्चात पनि निगमलाई आगामी १५ दिनमा अनुमानित रु. ४ अर्व २५ करोड घाटा नै रहने स्थिति देखिएको निगमले जनाएको छ।
सत्य, तथ्य र स्वतन्त्र सामूदायिक डिजिटल मिडिया
