अन्तत: अर्थमन्त्री जनार्दन शर्माले पदबाट राजीनामा दिएका छन् । बुधबार प्रतिनिधिसभा बैठकमा सम्बोधन गर्दै अर्थमन्त्री शर्माले पदबाट राजीनामा दिएको घोषणा गरेका हुन् ।
छानबिन गर्न संसदले संसदीय विशेष समिति बनाए लगतै शर्माले राजीनामा दिएको घोषणा गरेका हुन्।अर्थमन्त्री शर्माले आर्थिक वर्ष २०७९/८० को बजेट निर्माणमा अनधिकृत व्यक्तिलाई प्रवेश गराई करको दर हेरफेर गराएको चर्को आरोप छ। त्यसमाथि पछिल्लो समय अर्थमन्त्रालयको सीसीटीभीफुटेज मेटाएको विषयलाई लिएर पनि उनी विवादमा तानिएका थिए ।
प्रतिनिधिसभाको आजको बैठकमा विशेष समय लिएर बोल्दै शर्माले प्रतिपक्षी दलले आफूप्रति पूर्वाग्रह देखाएको भए पनि सहमतिमा छानबिन समिति गठन भएको बताए ।
समितिले छानबिन गरोस् भन्ने आग्रह गर्दै उनले आफूबाट कुनै पनि अनधिकृत काम नभएको बताए । तोकिएको मानिस बाहेक बजेट निर्माणका अन्य कोही पनि मानिस संलग्न नभएको उनको भनाई थियो । अर्थमन्त्रीले शर्माले भने, “सैनिक नेतृत्वले जस्तै दोषी करार गरियो । यो राजनीतिक पूर्वाग्रहको पराकाष्ठा हो । यो राजनीतिक प्रतिशोध हो ।”
उनले आफूविरुद्ध अनेक कथा बुनिएको भन्दै अर्थमन्त्रीले मन्त्रालयमा राखिएको सिसिटिभीको क्षमताका बारेमा थाहा नभएको र आफूले त्यसका बारेमा कुनै चासो नराखेको बताए ।
सत्य, तथ्य र स्वतन्त्र सामूदायिक डिजिटल मिडिया
