नेपालमा यती एयरलाइन्सको विमान आइतबार पोखरामा दुर्घटना हुदा कम्तिमा ६८ जनाको मृत्यु भएको छ । पछिल्लो रिपोर्ट अनुसार पोखराको सेती नदीको खोँचमा दुर्घटना भएको यती एयरलायन्सको विमानमा सवार ६८ जनाको शव फेला परेको छ । विमानमा ५३ नेपाली, १५ विदेशी र ४ चालक दलका सदस्यसहित ७२ यात्रु सवार थिए ।
काठमाडौंबाट पोखराका लागि उडेको यती एयरलाइन्सको एटीआर ७२, ९एन–एएनसी विमान आईतबार बिहान १०ः३० बजे नयाँ गाउँमा दुर्घटना भएको हो । यती एयरलाइन्सका अनुसार आज बिहान १० बजेर ५० मिनेटमा सेती घाटबाट पोखरा अन्तर्राष्ट्रिय विमानस्थलको टावरसँग विमानले अन्तिम सम्पर्क गरेको थियो।
५३ नेपाली, ५ भारतीय, ४ रुसी, १ आयरिश, १ अस्ट्रेलियन, १ अर्जेन्टिनी, २ कोरियन र १ फ्रान्सेली गरी ६८ यात्रु र ४ जना चालक दलका सदस्य थिए ।
बिहान ११ बजे पोखरा विमानस्थलमा अवतरण हुनु केही सेकेण्डअघि पुरानो विमानस्थल र नयाँ विमानस्थलबीचको सेती नदीको किनारमा विमान दुर्घटना भएको थियो ।
विमान दुर्घटना हुँदा आगो लागेको र सामाजिक सञ्जाल प्लेटफर्ममा पोस्ट गरिएका तस्विर र भिडियोहरूले दुर्घटनास्थलबाट धुवाँको मुस्लो निस्किरहेको देखाएको छ।
मिडिया स्रोतका अनुसार दुर्घटनास्थलबाट ६८ जनाको शव निकालिएको छ । दुर्घटनामा कोही पनि बाँच्न नसकेको बताइएको छ । बाँकी चार जनाको खोजी भइरहेको छ ।
पोखरामा आइतबार एटीआर विमान दुर्घटना भएपछि यती एयरलाइन्सले भोलि (सोमबार)का लागि तय भएका सबै उडान रद्द गरेको छ ।
एयरलाइन्सले आइतबार साँझ एक विज्ञप्ति जारी गर्दै भोलिका लागि तय भएका सबै नियमित उडान रद्द गरिएको जानकारी दिएको हो ।
एयरलाइन्सका अनुसार भोलि आपत्कालीन र उद्धार उडान हुनेछ ।
यसैगरी, नेपाल सरकारले भोलि माघ १६ गते शोक बिदा दिने निर्णय गरेको छ ।
सरकारका प्रवक्ता अर्थमन्त्री विष्णु पौडेलका अनुसार आज बालुवाटारमा बसेको मन्त्रिपरिषद्को बैठकले पोखरामा यती एयरलाइन्सको विमान दुर्घटनामा परी भएको मानवीय क्षतिप्रति शोक बिदा दिने निर्णय गरेको हो ।
‘घटनाप्रति मन्त्रिपरिषद्ले गहिरो दुःख व्यक्त गरेको छ। भोलि माघ १६ गते दुखद घटनामा शोक मनाउने र एक दिन सार्वजनिक बिदा दिने निर्णय गरिएको छ,’ पौडेलले संचार माध्यमलाई जानकारी दिए ।
बैठकले घटनाबारे परिवारका सदस्यलाई जानकारी गराउन त्रिभुवन अन्तर्राष्ट्रिय विमानस्थलमा कल सेन्टर स्थापना गर्ने निर्णय पनि गरेको छ ।
दुर्घटनाको कारण पत्ता लगाउन छानबिन समिति पनि गठन गरिएको छ ।
आइतबार ७२ यात्रु बोकेको नेपाली यात्रुवाहक विमान दुर्घटनाको साक्षी बनेको पोखरा अन्तर्राष्ट्रिय विमानस्थल दुई साताअघि मात्र उद्घाटन गरिएको थियो ।
सत्य, तथ्य र स्वतन्त्र सामूदायिक डिजिटल मिडिया
