पाकिस्तानको पेशावर सहरमा भएको शक्तिशाली बम विस्फोटमा अहिलेसम्म ६१ जनाको मृत्यु भएको छ भने करिब २०० जना घाइते भएका छन् । डन न्युज टिभीमा देखाइएका फुटेजका अनुसार पेशावरको पुलिस लाइन्स क्षेत्रमा रहेको मस्जिदमा विस्फोट भएको बताइएको छ । उही समयमा, टेलिभिजन रिपोर्टहरूले भनेका छन् कि विस्फोट १ : ४० बजे (स्थानीय समय) मा दिउसोको (जोहर) नमाज पढिरहेको बेला भएको थियो। आक्रमणको जिम्मेवारी पाकिस्तान तालिवान (टीटीपी) ले लिएको छ।
डन न्युज टिभीका अनुसार उक्त क्षेत्रमा आपतकालीन अवस्था लागू गरिएको छ र क्षेत्रलाई घेराबन्दी गरिएको छ। यसै क्रममा जियो न्यूजले आफ्नो रिपोर्टमा हाल ६१ जनाको मृत्यु र करिब २०० जना घाइते भएको र यो बम विस्फोट आत्मघाती बम आक्रमणकारीले गराएको बताएको छ ।
सुरक्षा अधिकारीहरूका अनुसार नमाजको क्रममा अगाडिको पंक्तिमा रहेका आत्मघाती हमलाकारीले आफु उपर आत्मघाती बम विस्फोट गराएको र उक्त बिष्फोट बाट अन्य दर्जनौं नमाज गर्दै गरेकाहरुलाई घाइते भएको समाचारमा जनाइएको छ । घाइतेहरुलाई पेशावरको लेडी रिडिङ अस्पतालमा भर्ना गरिएको छ ।
जियो न्यूजका अनुसार घाइतेमध्ये अधिकांशको अवस्था निकै चिन्ताजनक रहेको बताइएको छ । अर्कोतर्फ, यो विष्फोट भएको ठाउँ भिआईपी क्षेत्र र वरिष्ठ प्रहरी अधिकारीहरूको निवास स्थल भएको बताइएको छ । रिपोर्टका अनुसार यो इलाका पुलिस लाइन क्षेत्रमा भएको हुनाले मस्जिदमा नमाज गर्ने अधिकांश प्रहरी नै थिए। सोही क्रममा विष्फोटका क्रममा मस्जिदमा ४०० भन्दा बढी मानिस रहेको पुष्टि भएको र विष्फोटपछि मस्जिद पूर्णरुपमा भत्किएको र धेरै मानिस भग्नावशेषमा फसेको खबर पनि समाचारमा उल्लेख गरिएको छ ।
मस्जिदमा चार तहको सुरक्षा व्यवस्था थियो । मस्जिदको सुरक्षाका लागि करिब तीन सय प्रहरी परिचालन गरिएको थियो । त्यतिका सुरक्षाका बीच आतङ्ककारीहरू कसरी भित्र छिर्न सफल भए भन्ने बारेमा अधिकारीहरुले अनुसन्धान शुरु गरेको बताइएको छ।
(एजेन्सीको सहयोग सहित )
सत्य, तथ्य र स्वतन्त्र सामूदायिक डिजिटल मिडिया
