अन्तर्राष्ट्रिय खुशी दिवसको अवसरमा संयुक्त राष्ट्र संघको दिगो विकास समाधान नेटवर्क (युएन सस्टेनेबल डेभलपमेन्ट सोलुसन नेटवर्क) ले वार्षिक खुसी प्रतिवेदन २०२३ सार्वजनिक गरेको छ । विश्व खुसी प्रतिवेदन २०२३ मा फिनल्याण्ड सबैभन्दा खुसी देश र अफगानिस्तान सबैभन्दा दुखी देश भएको छ।
फिनल्यान्डले यो सहित लगातार छैटौं पटक पहिलो स्थान हासिल गरेको छ ।
१३७ देशको सूचीमा नेपाल ५.४ अंक सहित ७८औं स्थानमा रहेको छ। नेपालले भारत लगायत पाकिस्तान, बंगलादेश , श्रीलंकालाई उछिनेको छ ।
चीन ६४ औं स्थानमा रहेको छ भने पाकिस्तान १०८ श्रीलंका ११२,बंगलादेश ११८ र भारत १२६औं स्थानमा रहेको छ।
भारतलाई उसका छिमेकी राष्ट्र पाकिस्तान , म्यानमार, नेपाल , बंगलादेश र चीन सबै ले उछिनेका छन्। प्रतिवेदनमा फिनल्यान्डलाई विश्वको सबैभन्दा खुसी देशको रुपमा वर्णन गरिएको छ ।
यो सूचीको अन्तिममा अफगानिस्तान १३७ औं स्थानमा छ । रिपोर्टका अनुसार त्यहाँका मानिसहरु सबैभन्दा दुखी छन् । सबैभन्दा कम खुसी देशहरूको सूचीमा अन्य देशहरू छन्- लेबनान, जिम्बाब्वे, प्रजातान्त्रिक गणतन्त्र कंगो आदि। यी देशहरूमा सबैभन्दा बढी भ्रष्टाचार र मानिसहरूको बाच्ने उमेर सबैभन्दा कम छ।
संयुक्त राष्ट्र संघको दिगो विकास समाधान नेटवर्कले सार्वजनिक गरेको यस प्रतिबेदनमा १५० भन्दा बढी देशका मानिसमा गरिएको विश्वव्यापी सर्वेक्षण तथ्याङ्कको आधारमा तयार पारिएको जनाइएको छ ।
यसमा प्रतिव्यक्ति जीडीपी, सामाजिक सहयोग, बाच्ने आयु , स्वतन्त्रता, भ्रष्टाचार र उदारता जस्ता कारकहरूलाई विशेष ध्यान दिइएको बताइएको छ।
पछिल्लो एक वर्षदेखि रुस–युक्रेन युद्ध चलिरहेको छ । अझै पनि खुशी सूचकाङ्कमा उनीहरुको स्थिति भारतभन्दा राम्रो छ । रुस ७० औँ र युक्रेन ९२ औँ नम्बरमा छ ।
सत्य, तथ्य र स्वतन्त्र सामूदायिक डिजिटल मिडिया
