त्रिभुवन विमानस्थलमा सुन तस्करीमा संलग्न रहेको अभियोगमा विमानस्थलका भन्सार अधिकृतसहित ६ जनालाई पक्राउ गरिएको राजस्व अनुसन्धान विभागले जनाएको छ । योसँगै सुन तस्करी प्रकरणमा पक्राउ पर्नेको संख्या १६ जना पुगेको छ ।
पक्राउ पर्नेमा भन्सार अधिकृत सन्तोष चन्द, खरिदकर्ता तथा चेकर कुमार ढकाल र एक्सरे अपरेटर सरोज श्रेष्ठ रहेका छन् । शनिबार भन्सार विभागले निलम्बन गरेपछि उनीहरुलाई आइतबार नियन्त्रणमा लिइएको हो । एक्स–रे मेसिनमा शंकास्पद देखिए पनि सुनको निरीक्षणमा लापरवाही गरेको भन्दै उनीहरुलाई निलम्बन गरिएको भन्सार विभाग स्रोतले जनाएको छ ।
सोही दिन अन्य तीनजनामा भन्सार एजेन्टहरू यादवशंकर पराजुली, सुदर्शन गौतम र रुक्मिना सुब्बालाई पक्राउ गरीएको छ। उनीहरु उपर थप अनुसन्धान भइरहेको स्रोतले जनाएको छ ।
राजस्व अनुसन्धान विभागले त्रिभुवन विमानस्थलमा सुन तस्करी भएको सूचना पाएपछि यो मुद्दा बाहिर आएको हो । सूचनाका आधारमा अधिकारीहरूले गत मंगलबार हङकङबाट क्याथे प्यासिफिक एयरलाइन्सको उडानमा ब्रेक सू मा लुकाएर तस्करी भइरहेको करिब १०० किलो सुन बरामद गरेको हो ।
पक्राउ परेका ६ जनाबाहेक विभागले यसअघि तस्करीमा संलग्न अन्य १० जनालाई पनि नियन्त्रणमा लिएको थियो । तीमध्ये एकजना चिनियाँ नागरिक छन् भने अर्का भारतीय नागरिक छन् ।
बरामद सुनको यकिन परिमाण पत्ता लगाउन राजस्व अनुसन्धान विभागले बरामद सुन बिहीबार नेपाल राष्ट्र बैंकको टक्सार शाखामा पठाएको थियो । यद्यपी तस्करी गरिएको सुनको सहि परिमाण अझै यकिन भएको छैन ।
यी व्यक्तिहरूको पक्राउले तस्करीको सञ्जालको दायरा र भविष्यमा यस्ता गैरकानूनी गतिविधि रोक्न आवश्यक उपायहरूको खोजी हुने अपेक्षा गरिएको छ। राजस्व अनुसन्धान विभागले सुन तस्करी नियन्त्रण गर्न र विमानस्थल भन्सार प्रक्रियाको निष्पक्षता कायम राख्न प्रयास जारी राखेको बताएको छ । अनुसन्धान अघि बढ्दै जाँदा घटनामा थप विवरण आउन बाँकी छ ।
सत्य, तथ्य र स्वतन्त्र सामूदायिक डिजिटल मिडिया
