उत्तरी म्यानमारको बहुमूल्य ढुङ्गा खानी पहिरो गई भत्किँदा मृत्यु भएका ३३ जना कामदारको शव भग्नावशेषबाट निकालिएको छ भने तीन जना अझै बेपत्ता छन् । उद्धार टोलीका एक अधिकारीले बुधबार संचार माध्यमलाई जानकारी दिएका हुन् ।
विश्वको सबैभन्दा ठूलो र बहुमूल्य ढुङ्गा खखानीको केन्द्र मानिने काचिन प्रान्तको हपाकान्तको मन्ना गाउँमा आइतबार खानी भत्किएको हो । उक्त घटनामा खानीको भग्नावशेष ३ सय मिटर तल तालमा खसेको थियो । यो दुर्घटनापछि ३५ जना भन्दा बढी भग्नावशेषमा दबिएका थिए ।
घटनापछि झण्डै १ सय ५० उद्धारकर्ताले पाँचवटा साना डुङ्गाको सहयोगमा काम सुरु गरेको स्थानीय उद्धार टोलीका एक अधिकारीले नाम न छाप्ने सर्तमा संचार माध्यमलाई बताएका छन् । हिलो पानी भएको तालबाट हालसम्म ३३ जनाको शव निकालिएको छ । कम्तीमा तीन जना अझै बेपत्ता रहेको उनले बताए ।
आफ्ना दुई आफन्त गुमाएका खानीका स्थानीय अधिकारीहरूले अन्तिम संस्कारका लागि प्रति पीडित ७ लाख क्याट (अमेरिकी डलर ३३० ) उपलब्ध गराएको बताए। यसअघि पनि हापाकाँतमा रहेको ढुङ्गा खानीको घटना बाहिर आएको थियो । सन् २०२२ को जुलाईमा सोही क्षेत्रमा खानी भत्किँदा १६२ जनाको ज्यान गएको थियो भने २०१५ मा यस्तै दुर्घटनामा ११३ जनाले ज्यान गुमाएका थिए ।
सत्य, तथ्य र स्वतन्त्र सामूदायिक डिजिटल मिडिया
