निकिता पौडेल लामिछाने, रवी लामिछानेकी पत्नी हुन्। उनका पति सहकारी ठगी काण्डमा अहिले हिरासतमा छन्। तर, रवी हिरासतमा रहेको यो समय उनी आफैं पनि मिडिया र सार्वजनिक चर्चाको केन्द्रमा छिन्। पछिल्ला केही दिनमा निकिता विरुद्ध विभिन्न समाचारहरू प्रकाशित भइरहेका छन्।
यसैबीच, निकिताले मिडियामा फैलिरहेका हल्ला र आरोपहरूको जवाफ दिँदै आफ्नो फेसबुक पोष्टमा स्पष्टिकरण प्रस्तुत गरेकी छन्।
बुवा-छोरीको संवाद र मिडियाको आलोचना
निकिताले पोष्टमा बुवासँगको संवाद उल्लेख गर्दै लेखेकी छन्,
“बुवाले फोनमा हाँस्दै सोध्नु भयो, ‘तिमीसँग त त्यत्रो पैसा रहेछ, कुनै मिडियाले १५ करोड, कुनैले २५ त, कसैले ५० करोड! तिमीसँग छ चाहिँ कति? अलिकति मलाई पनि देऊ न।’ मैले पनि हाँस्दै भने, ‘त्यत्रो पैसा भएरै होला ४ करोडमा किनेको घरको किस्ता आजसम्म तिर्दै छु।’”
उनले यो संवादले मिडिया ट्रायलप्रति इङ्गित गरेको भन्दै थप लेखेकी छन्,
“कुनै मिडियाले १५ करोड, कुनैले २५ करोड, त कुनैले ५० करोड लेखेका छन्। मिडियाले धर्म नछोडेको भए बैंकिङ कारोबारका अंक सबैमा ठ्याक्कै एउटै हुनुपर्ने होइन र?”
संवेदनशील विषयमा मिडियाको संवेदनहीनता
निकिताले मिडियाको भूमिका र जिम्मेवारीमाथि प्रश्न उठाउँदै लेखेकी छन्,
“मेरो सम्पूर्ण बैंकिङ विवरण प्रहरीलाई बुझाइसकेकी छु। यस्तो संवेदनशील विषयमा किन मिडिया यति संवेदनहीन भएका होलान् भनेर सोच्छु। मेरो खाता हो। यति-उति पैसा छ भनेर अनुमान लगाउनुभन्दा सोधेको भए बताइदिन्थे नि! समाचार लेख्नेमाथि दया लागेर आउँछ।”
उनले श्रीमान् हिरासतमा भएको बेला केही मिडियाले आफूविरुद्ध गरेको व्यवहारप्रति पनि असन्तोष व्यक्त गर्दै लेखेकी छन्,
“केही मिडियाले देखाएको ‘पुरुषार्थ’ अगाडि समाज मुकदर्शक बनेको देख्दा झनै आश्चर्य लाग्छ। मेरो श्रीमानले सहकारीबाट ऋण लिएको प्रमाण छ भन्नेलाई, प्रमाण मात्रै देउ भनेको हो। अहिले पनि हामी त्यो प्रमाण कुरिरहेका छौं।”
मिडिया र तथ्यको जिम्मेवारी
निकिताको यो अभिव्यक्तिले समाचार लेख्दा तथ्यमा आधारित हुनु, संवेदनशीलता कायम राख्नु, र आरोपमा सन्तुलन खोज्नुपर्ने आवश्यकता झल्काएको छ।
सार्वजनिक जीवनमा रहेका व्यक्तिहरूका व्यक्तिगत कुरालाई हल्लाको आधारमा प्रस्तुत गर्दा मिडियाको भूमिकामाथि प्रश्न उठ्न थालेको छ। समाजले अब यसप्रति गम्भीर ध्यान दिनुपर्ने आवश्यकता देखिएको छ।
सत्य, तथ्य र स्वतन्त्र सामूदायिक डिजिटल मिडिया
