श्रीलङ्काका प्रधानमन्त्री रनिल विक्रमासिङ्घेले शुक्रबार श्रीलङ्काको अन्तरिम राष्ट्रपतिको सपथ ग्रहण गरेका छन् ।
प्रधानन्यायाधीश जयन्थ जयसूर्याले विक्रमासिङ्घेलाई अन्तरिम राष्ट्रपतिको सपथ ग्रहण गराएका थिए ।संसदले नयाँ राष्ट्रपति चयन नगरेसम्म विक्रमासिङ्घेले अन्तरिम राष्ट्रपतिको रूपमा काम गर्ने छन् ।
यसअघि सिङ्गापुर पुगेका राष्ट्रपति गोटबाया राजापाक्षेले सभामुखलाई इमेलमार्फत राजीनामा दिएका थिए । श्रीलंकाका सभामुख महिन्दा यापा अबेवर्देनाले राष्ट्रपति राजापाक्षेको राजीनामाको औपचारिक घोषणा गरेका थिए ।
“दक्षिण एसियाको सबैभन्दा पुरानो लोकतन्त्र भएकोले म सबै राजनीतिक दल र जनतालाई लोकतान्त्रिक अभ्यासको पालना गर्न र वर्तमान अवस्थालाई समाधान गर्न आवश्यक कदम चाल्न सहयोग गर्न आग्रह गर्दछु,” सभामुखले राजापाक्षेको राजीनामाको औपचारिक घोषणा गर्दै भने ।
आगामी राष्ट्रपतिका लागि उम्मेदवारी मनोनयन गर्न र त्यसपछि २ सय २५ सांसदको निर्वाचनका लागि शनिबार संसदको बैठक बोलाइएको छ ।
श्रीलङ्कामा खाद्यान्न, इन्धनको अभाव र अर्थतन्त्रको गलत व्यवस्थापनलाई लिएर महिनौंदेखि विरोध प्रदर्शन हुदै आएको छ । श्रीलङ्कामा मुद्रास्फीति ५० प्रतिशतभन्दा बढी छ ।
महिन्दा र बासिल राजपक्षेलाई देश छाड्न प्रतिबन्ध
यसै बीच श्रीलंकाको सर्वोच्च अदालतले पूर्व प्रधानमन्त्री महिन्दा राजपक्षे र पूर्व वित्त मन्त्री बासिल राजपक्षेलाई श्रीलंका छोड्न प्रतिबन्ध लगाएको छ ।
बासिल राजपक्षेले केही दिन पहिला श्रीलंका छोडेर जाने प्रयास गरेका थिए विमानस्थलका कर्मचारीहरुले उनलाई विमानमा सवार हुन दिएका थिएनन् ।
यसपछि श्रीलंकाको सर्वोच्च अदालतले दुबै नेताहरुलाई शुक्रबारबाट २८ जुलाई सम्म देश छाडेर जान प्रतिबन्ध लगाइदिएको छ । यसअघि श्रीलंकाका राष्ट्रपति गोटाबाया राजपक्षे देश छोडेर सिंगापुर पुगेका थिए ।
उनले त्यहीबाट इमेल मार्फत राजीनामा घोषणा गरेका थिए । उनी भागेसँगै प्रधानमन्त्री रनिल विक्रमसिंघेले शुक्रबार अन्तरिम राष्ट्रपति पदको शपथ लिएका हुन।
सत्य, तथ्य र स्वतन्त्र सामूदायिक डिजिटल मिडिया
