राजतन्त्रको पुनर्स्थापना र नेपाललाई पुनः हिन्दु राष्ट्र बनाउनुपर्ने मागसहित शुक्रबार बिहान सुरु भएको प्रदर्शन साँझसम्म झन् हिंसात्मक बनेको छ। राजधानी काठमाडौंका विभिन्न क्षेत्रमा हजारौं प्रदर्शनकारीले सडक अवरुद्ध गर्दै गणतन्त्रविरोधी नाराबाजी गरेपछि प्रहरीले बल प्रयोग गरेको छ।
शुक्रबार बिहानबाट सुरु भएको प्रदर्शन
शुक्रबार बिहान १० बजे टिनकुने , कोटेश्वर, र एयरपोर्ट क्षेत्रमा राजतन्त्र पक्षधरहरू प्रदर्शनमा उत्रिएका थिए। नवराज सुवेदी र दुर्गा प्रसाईंको नेतृत्वमा सुरु भएको र्यालीमा प्रदर्शनकारीहरूले “राजा आउ, देश बचाऊ,” “गणतन्त्र खारेज गर,” जस्ता नारा लगाउँदै त्रिभुवन अन्तर्राष्ट्रिय विमानस्थल नजिकैको सुरक्षा घेरा तोड्ने प्रयास गरेका थिए।
शुक्रबार साँझसम्मको स्थिति: हिंसा र तोडफोड जारी
शुक्रबार साँझसम्म स्थिति थप तनावग्रस्त बनेको छ। टिनकुने, कोटेश्वर, बानेश्वर, र सिनामंगल क्षेत्रमा प्रदर्शनकारीहरूले सडकमा टायर बालेर अवरोध सिर्जना गरेका छन्। प्रहरीले स्थिति नियन्त्रणमा लिन अश्रुग्यास, रबर गोली र पानीको फोहोरा प्रयोग गरेपछि प्रदर्शनकारीहरूले झडपमा उत्रिए।
टिनकुने र सिनामंगल क्षेत्रमा हिंसात्मक झडप हुँदा कम्तीमा ५० जना घाइते भएका छन्। घाइतेमध्ये २० जना सुरक्षाकर्मी र ३० जना प्रदर्शनकारी रहेका छन्। टिनकुने क्षेत्रमा प्रदर्शनकारीहरूले सडकमा पार्किङ गरिएका गाडीहरूमा आगजनी गरेका छन्।
प्रहरी र प्रदर्शनकारीबीच झडप: दर्जनौं पक्राउ
प्रहरी र प्रदर्शनकारीबीचको झडपमा शुक्रबार साँझसम्म दर्जनौं प्रदर्शनकारी पक्राउ परेका छन्। प्रहरी स्रोतका अनुसार, अहिलेसम्म २०० भन्दा बढी प्रदर्शनकारीलाई “अशान्ति मच्चाएको” आरोपमा नियन्त्रणमा लिइएको छ। प्रहरीले टिनकुने, सिनामंगल, र बानेश्वर क्षेत्रबाट मुख्य प्रदर्शनकारीहरूलाई नियन्त्रणमा लिएको जनाएको छ।
सुरक्षा सतर्कता र कर्फ्यू विस्तार
शुक्रबार बेलुकी काठमाडौं जिल्ला प्रशासन कार्यालयले जारी गरेको नयाँ आदेशअनुसार, टिनकुने- बानेश्वर क्षेत्रमा शुक्रवार दिउसो ४:२५ देखी राती १० बजेसम्म कर्फ्यू लगाइएको छ।
टिनकुने र बानेश्वरमा आगजनी र तोडफोड
शुक्रबार दिउसो टिनकुने क्षेत्रमा प्रदर्शनकारीहरूले सरकारी कार्यालय र सवारी साधनमा आगजनी गरे। कोटेश्वर र बानेश्वरमा पनि प्रदर्शनकारीहरूले केही सरकारी गाडीमा तोडफोड गरेका छन्। स्थानीय प्रत्यक्षदर्शीका अनुसार, “प्रदर्शनकारीहरूले प्रहरीको सुरक्षा घेरा तोड्ने प्रयास गरेपछि प्रहरीले बल प्रयोग गरेको थियो। टिनकुनेमा गाडीहरूमा आगो लगाइएपछि स्थिति झन् बिग्रियो।”
शुक्रबारको घटनापछि प्रदर्शनकारीहरूले शनिबार देशव्यापी प्रदर्शन गर्ने घोषणा गरेका छन्। पोखरा, बुटवल, चितवन, विराटनगर, र जनकपुरमा शनिबार बिहानदेखि प्रदर्शन गर्ने तयारी भइरहेको छ। स्थानीय प्रशासनहरूले सुरक्षाका लागि थप सतर्कता अपनाउने निर्णय गरेका छन्।
पूर्वराजा ज्ञानेन्द्रको मौनता र प्रदर्शनकारीको उत्साह
यसबीच, पूर्वराजा ज्ञानेन्द्र शाहले प्रदर्शनमा कुनै औपचारिक प्रतिक्रिया दिएका छैनन्। तर, गत हप्ता पोखराबाट काठमान्डौ फर्किदा राजतन्त्र पक्षधरहरूको ठूलो स्वागत र समर्थन देखिएपछि प्रदर्शनकारीहरू झन् उत्साहित भएका छन्।
शनिबारको रणनीति: थप झडपको सम्भावना
प्रदर्शनकारीहरू शनिबार र आइतबार देशव्यापी आमहड्ताल र विशाल प्रदर्शनको तयारी गरिरहेका छन्। नवराज सुवेदी र दुर्गा प्रसाईंको नेतृत्वमा शनिबार बेलुकी आन्दोलनको नयाँ रणनीति सार्वजनिक गर्ने तयारी गरिएको स्थानीय समाचारश्रोतले जानकारी दिएको छ।
शनिबारको प्रदर्शन थप हिंसात्मक बन्न सक्ने अनुमान गरिएको छ। सुरक्षाकर्मीहरूलाई उच्च सतर्कतामा रहन निर्देशन दिइएको छ।
भविष्यको परिदृश्य: अस्थिरताको संकेत
राजनीतिक विश्लेषकहरूका अनुसार, हिंसा र असन्तुष्टिको यो लहर थप बढ्न सक्ने सम्भावना छ, जसले देशलाई थप अस्थिरताको दिशामा लैजान सक्छ। काठमाडौं उपत्यकामा सुरक्षा सतर्कता उच्च रहेको छ, सर्वसाधारणलाई अनावश्यक रूपमा घर बाहिर ननिस्कन प्रशासनले पुनः अनुरोध गरेको छ।
सत्य, तथ्य र स्वतन्त्र सामूदायिक डिजिटल मिडिया
