स्वास्थ्य तथा जनसङ्ख्या मन्त्रालयले कोरोना भाइरसको नयाँ भेरियन्ट बीएफ–७ बारे सचेत रहन सर्वसाधारणलाई अपिल गरेको छ ।
मन्त्रालयले आज एक विज्ञप्ति जारी गर्दै नेपालमा हालसम्म कोभिड–१९ को नयाँ संस्करण पुष्टि नभए पनि छिमेकी मुलुकमा यसको बढ्दो प्रभावका कारण नेपालमा पनि सतर्कता अपनाउनुपर्नेमा जोड दिएको छ ।
छिमेकी मुलुकमा फैलिएको कोभिड–१९ को नयाँ संस्करण बीएफ ७ नेपालमा अहिलेसम्म पुष्टि भएको छैन । तर, खुला सिमाना र मानिसको आवतजावतका कारण नेपालमा पनि यो संक्रमणको जोखिम रहेकोले यसको रोकथाम र नियन्त्रणका लागि सर्वसाधारण सचेत र सचेत हुन आवश्यक रहेको मन्त्रालयले जनाएको छ ।
कोभिड–१९ को सङ्क्रमणबाट नेपालले धेरै आर्थिक क्षति बेहोरेको हुँदा सङ्घीय सरकार, प्रदेश र स्थानीय तहका सबै संयन्त्रलाई यसको पहिचान, रोकथाम र उपचारका लागि परिचालन गर्नुपर्ने पनि मन्त्रालयले जनाएको छ ।
मन्त्रालयका अनुसार हाल कोभिड–१९ को पहिचान, रोकथाम र उपचारका लागि अन्तर्राष्ट्रिय नाका र विमानस्थलबाट आउने शङ्कास्पद यात्रुको ज्वरो नाप्ने, एन्टिजेन परीक्षण र आनुवंशिक परीक्षण भइरहेको छ ।
क्रिसमस र नयाँ वर्षको समय भएकाले मास्कको अनिवार्य प्रयोग, शारीरिक दूरी कायम राख्ने, साबुन पानीले हात धुने, स्यानिटाइजरको नियमित प्रयोग जस्ता स्वास्थ्य मापदण्ड अपनाउन पनि स्वास्थ्य मन्त्रालयले सर्वसाधारणलाई अपिल गरेको छ ।
कोभिड–१९ विरुद्ध थप ‘बुस्टर डोज’ नपाएको सर्वसाधारणलाई नजिकैको स्वास्थ्य संस्थामा गएर खोप लिन पनि मन्त्रालयले अनुरोध गरेको छ ।
सत्य, तथ्य र स्वतन्त्र सामूदायिक डिजिटल मिडिया
