अभिनेता पल शाहले नाबालिग बलात्कारको मुद्दामा सफाइ पाएका छन् । उच्च अदालत पोखराले नाबालिग बलात्कारको मुद्दामा पल शाह (पूर्णविक्रम शाह) लाई आइतबार सफाइ दिएको हो।
बाल यौन दुर्व्यवहारको मुद्दामा अभिनेता शाहले तनहुँ जिल्ला कारागारमा जेल सजाय काटिरहेका थिए । जिल्ला अदालत नवलपुरको फैसला उल्ट्याउँदै उच्च अदालत पोखराले आइतबार शाहलाई सफाइ दिएको हो ।
उच्च अदालत पोखराका न्यायाधीशद्वय डिल्लीराज आचार्य र श्रीधरा कुमारी पुडासैनीको संयुक्त इजलासले बाल यौन दुरुपयोगको अभियोग दाबी नपुग्ने फैसला सुनाएको हो । यो फैसलासँगै अभिनेता शाह जेलमुक्त हुने भएका छन् ।
शाहलाई गत भदौ १० मा नवलपुर जिल्ला अदालतका न्यायाधीश यज्ञप्रसाद आचार्यको एकल इजलासले बलात्कार अभियोगबाट सफाइ दिए पनि बाल यौन दुरुपयोगमा २ वर्ष ६ महिना कैद सजाय, २५ हजार जरिवाना र पीडितलाई १० लाख क्षतिपूर्ति दिनुपर्ने फैसला सुनाएको थियो । जिल्ला न्यायाधीश कोमलप्रसाद आचार्यको इजलासले बलात्कारको अभियोगमा दाबी नपुगेको भन्दै शाहलाई सफाइ दिएको थियो।
जिल्ला अदालत नवलपुरको फैसलाविरुद्ध अभिनेता शाहले उच्च अदालत पोखरामा पुनरावेदन दिएका थिए ।
२०७८ फागुन ११ गते तनहुँमा र फागुन १५ गते नवलपुर प्रहरीमा बालिकाका बुवाले आफ्नी छोरीमाथि शाहले पटक पटक जबरजस्ती करणी गरेको भन्दै जाहेरी दिएका थिए । शाह फागुन १५ गते उक्त प्रहरी कार्यालयमा आफै सम्पर्कमा आएका थिए । पहिले जबरजस्ती करणी गरेको भन्दै जाहेरी दिए पनि पछि पीडित भनिएकी बालिका र उनका बुवाले समेत दुवै अदालतमा बलात्कार नभएको भन्दै बयान फेरेका थिए ।
अदालतको फैसलाको पूर्णपाठ:
सत्य, तथ्य र स्वतन्त्र सामूदायिक डिजिटल मिडिया
