खोटाङ जिल्लाको हलेसी तुवाचुङ नगरपालिकाले सबै कार्यालय, विद्यालय, अस्पताल लगायतका सार्वजनिक ठाउँमा जाँड – रक्सी खाए / नखाएको परीक्षण (मापसे) गर्ने भएको छ । तुवाचुङ नगरपालिकामा शिक्षक, स्वाथ्यकर्मी, कार्यालय सहयोगीहरुले मादक पदार्थ सेवन गरेर कार्यालयमा आउने गरेको गुनासो आएपछि मापसे परीक्षण गर्ने निर्णय गरिएको नगरपालिकाले जनाएको छ।
मेयर विमला राईले संचार माध्यमलाई जानकारी दिए अनुसार नगरपालिकाको ९८ औँ कार्यपालिका बैठकबाट मापसे परीक्षण गर्ने सात वटा ब्रेथलाइजर उपकरण खरिद गर्ने निर्णय गरेको हो । नगरभित्र रहेका ६ वटा प्रहरी चौकी र १ नगर अस्पतालमा ब्रेथलाइजर उपकरण दिने नगरपालीकाले निर्णय गरेको छ।
मेयर राईका अनुसार विद्यालयका प्रधानाध्यापकले वार्षिक परिक्षाको प्रश्नपत्र नै मापसे गरेर सिरानी लगाएर सुत्ने, स्वास्थ चौकीमा केही स्वास्थ्यकर्मी पनि मापसे गरेर आउने, अझ वडा कार्यालयमा समेत सहयोगी कर्मचारीहरु मापसे गरेर कार्यालय नै नियमित नआउने गरेको गुनासो आएपछि पालिकाले मापसे परीक्षण गर्ने निर्णय गरेको हो ।
सार्वजनिक ठाउँहरुमा समेत प्रायस मापसे गरेर झगडा हुने गरेकाले त्यसको रोकथामका लागि पनि मेसिन खरिद गर्न लागिएको मेयर राईले बताएकी छन् । कतै झगडा भएमा या कार्यालयहरुमा कोही मापसे गरेर आएको थाहा पाएमा तत्काल नजिकैको प्रहरी चौकीबाट प्रहरी खटिएर मापसे परीक्षण गर्नेछ । मापसे गरेको पाइएमा आवश्यक कारवाही अघि बढाइने मेयर राईले संचार माध्यमलाई बताएकी छन ।
सत्य, तथ्य र स्वतन्त्र सामूदायिक डिजिटल मिडिया
